COHO – Caribisch Orgaan voor Hervorming en Ontwikkeling i.o.

 

COHO – Caribisch Orgaan voor Hervorming en Ontwikkeling i.o.

Akuerdo proposishon di lei Rijkswet Caribisch Orgaan voor hervorming en ontwikkeling
Hulanda, Aruba, Kòrsou i Sint Maarten a yega na un akuerdo tokante introdukshon di e proposishon di lei pa e Rijkswet Caribisch Orgaan voor Hervorming en Ontwikkeling (COHO, Lei di Reino di e Órgano Karibense di Reforma i Desaroyo). Den e último lunanan diferente ròndu di kombersashon a tuma lugá entre e partidonan tokante e konsehonan di e Raad van Advies i e Raden van Advies karibense. E kombersashonnan a tuma lugá den un atmósfera bon i tabata konstruktivo. Finalmente a alkansá konsenso.
Sekretario di Estado Raymond Knops: ‘E último lunanan komo pais den Reino nos a hiba kombersashonnan intensivo i a negoshá sólidamente. Mi ta kontentu ku awor huntu nos ta di akuerdo tokante e proposishon di lei, ku lo bai pèrkurá pa e resistensia finansiero ekonómiko di Aruba, Kòrsou i Sint Maarten oumentá. Ta e fundeshi bou di e koperashon di añanan largu ku nos a palabrá ku otro.’
Minister presidènt di Sint Maarten, Silveria Jacobs: ‘Gobièrnu di Sint Maarten ta kontentu ku a realisá e ahustenan nesesario pa e Rijkswet proponé. Durante di e último kuater simannan, tabatin hopi kombersashon i kolaborashon pa yega na e punto aki. Sint Maarten ta spera ku por fortalesé e relashon entre e partnernan di Reino aun mas tantu na interes di nos hendenan.’
Minister presidènt di Aruba, Evelyn Wever-Croes: ‘E último periodo tabata un periodo difísil i instruktivo. Komo pais, nos a sinta na mesa di negosiashon ku konvikshon pa por krea e mihó resultado pa nos habitantenan. Nos institutonan tabata desisivo den esaki. Awor tin un proposishon di lèi kaminda nos, komo paisnan den Reino, por demostrá ku rèspèt mutuo, kolaborashon i durabilidat ta pilá di nos Reino.’
Minister presidènt di Kòrsou, Gilmar Pisas: ‘Mi ke ekspresá mi agradesimentu na e ekiponan di empleado públiko, ku a base di konseho di Raad van State i e Raden van Advies a adaptá e proposishon di e rijkswet di tal forma ku e proposishon ta hustifiká nos outonomia, i ku ta brinda mihó perspektiva finansiero i sosial na e pueblo. E pueblo ta na promé lugá serka nos. Nos lo laga evaluá e proposishon di lei ahustá un bia mas dor di nos Raad van Advies i despues parlamento tambe lo trata e kontenido. Ku kontinuashon di e reformanan i reahuste di un ekonomia ku ta krem, nos ta spera ku pronto e efektonan lo ta visibel pa e pueblo.
E palabrashonnan
Basá riba konseho di Raad van State di Reino i Raden van Advies i kombersashonnan entre e partidonan a hasi algun ahuste den e proposishon di lei.
Kompetensianan di COHO
Den e proposishon di lei ta amplia responsabilidat di e paisnan riba e reformanan. Por ehèmpel nan ta responsabel pa formulashon i stipulashon di e plannan di enfoke. E kompetensia di COHO ta limitá su mes na duna sosten na i supervishon di e reformanan. Ademas lo envolví e paisnan ora di formulashon di e reglanan di maneho di COHO.
Ròl di ministerio di BZK
E ròl di ministerio di BZK ta dirigí riba e agènda di ehekushon ku COHO ta formulá konhuntamente ku e paisnan. BZK por duna instrukshon na COHO ora tin indikashon ku ta traspasá e límitenan di e pakete di pais ku e agènda di ehekushon. Lo anda koutelosamente ku e kompetensia aki.
Supervishon finansiero i fiansa di sèn
Den e proposishon di lei adaptá ta remplasá e supervishon finansiero agudisá ku un evaluashon di presupuesto ku e Kolegio (Aruba) supervishon finansiero ta ehekutá. E kolegionan aki lo verifiká si a tradusí e aktividatnan konkreto den e agènda di ehekushon na un manera responsabel den e presupuesto. Banda di esaki lo verifiká si den e presupuesto a inkorporá elemento ku ta stroba e pakete di pais. COHO no ta supervisá esaki, e supervisornan finansiero ta hasi esaki via un supervishon persupuestario eksistente mas amplio.
Nombramentu di miembronan di direktiva
Pa konstelashon i nombramentu di direktiva di COHO a yega na un kompromiso ku tur pais por bai di akuerdo kuné. Di e tres miembronan di e direktiva por lo ménos dos miembro, entre nan e presidente, lo mester tin afinidat demostrabel ku e paisnan karibense den Reino. Banda di e kriterionan di nombramentu a yega na un akuerdo tambe tokante e prosedura di nombramentu, kaminda e paisnan ta forma e komishon di konseho di nombramentu.
E proseso
Riba 3 di sèptèmber binidero den Konseho di Minister di Reino lo deliberá riba e proposishon di lei tokante kua e partidonan a alkansá akuerdo riba dje. Despues di e akuerdo di Konseho di Minister di Reino por entregá e proposishon na Tweede Kamer i e parlamentonan di Aruba, Kòrsou i Sint Maarten. Na e momento ei e proposishon di lei lo bira públiko.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: