NOS SELEKSHONNAN NASHONAL KATEGORIA U-14 TA RUMBO PA REPÚBLIKA DOMINIKANA PA PARTISIPÁ NA E CFU 2021 GIRLS’ & BOYS’ U-14 CHALLENGE SERIES!
NOS SELEKSHONNAN NASHONAL KATEGORIA U-14 TA RUMBO PA REPÚBLIKA DOMINIKANA PA PARTISIPÁ NA E CFU 2021 GIRLS’ & BOYS’ U-14 CHALLENGE SERIES!
Awe djabièrnè 20 di ougùstùs, pa mitar di 3 di atardi riba un buelo di ‘charter’, nos selekshon nashonal di dama kategoria U-14 i nos selekshon nashonal di mucha hòmber kategoria U-14 a sali pa Repúblika Dominikana. Ámbos selekshon lo partisipá na e CFU 2021 Girls’ & Boys’ U-14 Challenge Series ku lo tuma lugá di 22 pa 29 di ougùstùs binidero.
Un total di 11 pais den Karibe lo kompetí ku otro den e CFU 2021 Girls’ U-14 Challenge Series. E paisnan aki ta lo siguiente; Grenada, Haiti, Jamaica, Puerto Rico, Aruba, Kòrsou,
St Kitts & Nevis, St. Lucia, Turks & Caicos Islans, U.S Virgin Islands i naturalmente Repúblika Dominikana ku ta e anfitrion di e torneo aki. Miéntras den e CFU 2021 Boys’
U-14 Challenge Series lo partisipá e mesun ekiponan aki huntu ku Boneiru i St Marten (parti franses) ku ta hasi e paisnan ku ta partisipá den e torneo aki 13.
Despues di dianan di training intensivo i preparashonnan ekstenso nos selekshonnan ta kla pa kumpli ku nan kompromisonan durante e kampionatonan aki.
FFK ta deseá tantu nos selekshon di dama kategoria U-14 i tambe nos selekshon di mucha hòmber kategoria U-14 tur klase di éksito i tin sigur ku nan lo sa di hasi un bon trabou na Repúblika Dominikana den e CFU 2021 U-14 Challenge Series.
20 ougùstùs 2021
