Trabounan pa desmantelá stèntnan na Awasá ta bai kuminsá

Trabounan pa desmantelá stèntnan na Awasá ta bai kuminsá

Geplaatst op 03 September 2021 dor di Ministerio Desaroyo Ekonómiko

Willemstad – Djaluna awor, dia 6 di sèptèmber, Ministerio di Desaroyo Ekonómiko (MEO) huntu ku Ministerio di Tráfiko, Transporte i Planifikashon Úrbano (VVRP) i Fundashon Marshe lo kuminsá ku trabounan di desmantelashon di e stèntnan na altura di Fuik/Awasá.

Pa un tempu kaba e sitio su estado a bini ta deteriorá i esaki no solamente ta forma un peliger pa e usuarionan, pero tambe ta un bista mahoso den nos Sentro di Siudat. E sitio di marshe situá na Fuik/Awasá tabata konta ku un total di 13 stènt ku ta wòrdu okupá 26 empresario ku ta ofresé e.o. souvenir i artistanan ku ta pinta.

Despues di a okupá e sitio pa años, tabata di komprondé ku e empresarionan en prinsipio tabata un poko mal kontentu ku e notisia di e desmantelashon. MEO i Fundashon Marshe a sinta ku sindikato i representante di e empresarionan akí pa asina yega na palabrashonnan konkreto kon e proseso di desmantelashon lo transkurí.

Komo solushon temporal, e empresarionan ku ta bende souvenir òf otro produktonan por akudí na Sha Caprileskade i esnan ku ta kai bou di e kategoria di artista por opta pa okupá un di e 9 sitionan pa artista ku tin aktualmente den Sentro di Siudat. Komo esnan enkargá pa tur aktividat di marshe den Sentro di Siudat, Fundashon Marshe a sinta kaba ku tur e empresarionan akí pa duna nan tur informashon relevante i guianan den e proseso di mudansa.