8 sèptèmber 2021: Dia Internashonal di Alfabetisashon

8 sèptèmber 2021: Dia Internashonal di Alfabetisashon

Geplaatst op 08 September 2021 dor di Ministerio Asuntunan General i Promé Minister

WILLEMSTAD –  Nashonnan Uní for di aña 1966 a dekretá 8 di sèptèmber komo dia Internashonal di Alfabetisashon. Esaki ku e meta pa mustra riba importansha di alfabetisashon di un persona òf grupo i na mes momentu mustra riba e benefisionan global i kultural pa tur pais. Pues e aña akí ta e di 55 aña ku ta pone atenshon na e tema akí kaminda e formashon literario ta den lus positivo. A skohe e siguiente lema: “Alfabetisashon ta sentral den rekuperashon di hende; asina ta redusí retraso digital” (Literacy for a human-centred recovery: Narrowing the digital divide).

Awe, riba e fecha akí, Gobièrnu di Kòrsou ke mustra riba e importansha di formashon i edukashon literario di nos pais ku ta un di e pilarnan pa garantisá desaroyo sostenibel, pas i demokrasia. E hecho ku e desaroyo teknológiko moderno i inovativo mundial a keda aselerá dor di e pandemia di COVID-19 ta un punto importante mas pa konsiderá den desaroyo di e hende.

Alfabetisashon ta un faktor importante pa un pais. Esaki ta formashon di mucha, eradikashon di pobresa, minimalisashon di abuso, stimulashon di igualdat i hopi mas. Tur e puntonan akí ta keda stimulá den e era moderno pa ban traha mas di forma digital. Pues e abilidat literario digital mester keda stimulá pa nos kana huntu ku e desaroyonan moderno. P’esei gobièrnu ta pone énfasis riba e área di digitalisashon, meskos ku e lema di e dia akí. Pa mas informashon bishitá: Dia Internashonal di Alfabetisashon 2021 

Komo gobièrnu ta trahando riba digitalisashon den enseñansa pa nos por kambia nos manera di eduká i forma e mucha, asina por stimulá un desaroyo moderno i inovativo. Den transkurso di lunanan ku ta bin, Ministerio di Enseñansa, Siensia, Kultura i Deporte – komo parti integral di gobièrnu huntu ku ‘stakeholders’ – ta bai lansa un kampaña informativo ku splikashon tokante digitalisashon. Di e forma akí gobièrnu ke bai traha mas dirigí na redusí e retraso digital den enseñansa.

Gabinete Pisas ke felisitá un di e organisashonnan ku ta Fundashon Pro Alfa ku nan di 35 aniversario. Gobièrnu ta agradesido pa e forma ku e organisashon akí a bin ta traha riba desaroyo di hende den kuadro di alfabetisashon. Nan aporte na desaroyo di e hende ta sumamente importante pa nos pais.

Danki na nòmber di Pueblo di Kòrsou pasó nos sa ku tur dia boso kurason ta bati pa Kòrsou.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: