Plataforma “Kòrsou Limpi i Dushi” pa atende for once and for all ku shushedat na Kòrsou

 

Plan presenta durante World Wellness Weekend i World Cleanup Day pa limpia Kòrsou den 5 luna i mantené limpi pa semper

Plataforma “Kòrsou Limpi i Dushi” pa atende for once and for all ku shushedat na Kòrsou

Willemstad – Durante di e World Wellness Weekend dia 18 i 19 di September tabatin tambe World Cleanup Day kaminda gruponan grandi di boluntario a bai limpia rònt Kòrsou komo parti di un movementu mundial pa pone atenshon na medio ambiente i limpiesa. Curaçao Cleanup huntu varios organisashon a mobilisá i gremionan di sektor priva, públiko i sosiedat sivil pa duna un man. Kòrsou Salú a tene un diskushon di panel titulá “Korsou ta Shushi” durante kuá diferente persona a duna un aporte na kon nos por logra limpia i mantené Korsou limpi. 

Invitadonan na e panel tabata Parlamentario Giselle McWilliam, Ex Mandatario Suzy Römer, President Commisaris di Selikor Abigail Paula, Inspektor di Medio Ambiente Clifford de Lannoy, Erwin Rafaela di Bario pa Bario, Rob de Lannoy, Internista i tambe Rudolf de Wit di Support. A identifiká varios punto ku ta ilustrá e motibunan dikón Kòrsou ta shushi. Hopi hende no tin kunes ku shushedat, hendenan a perde kunes i ta mira esaki bek te hasta den nan komportashon den trafiko,  por ehempel di e forma kon ta pasa den lus korá. Pues no tin respet pa reglanan i no tin sanshon ora benta shushi unda ku ta. Falta di patriortismo tambe a keda identifiká komo un motibu pa kua hendenan ta benta asina tantu shushi tur kaminda na Kòrsou i no tin rèspet pa naturalesa i medio ambiente. E shushedat ta un simptoma di un problema mas grandi ku nos tin na Kòrsou i mester atendé i investigá komportashon di nos pueblo i yega na un manera pa drai bek e tendensia aki. Tin ku forma i eduka nos hendenan for di skol i pa esaki sigui amplia bai kas i organisashonan den bario i di hobennan. Mester introdusí leinan i tambe ekipá e instansianan ku mester implementá i aktua pa asina nan por atende ku hendenen ku ta kibra ku regla. Falta di informashon por ehempel na unda mester yama, unda por bai, i tambe e echo ku mester paga na Landfil ta hunga un rol masha grandi.  Tin varios landfil ilegal na Kòrsou. Tin varios hende ku ta kobra pa pasa piki bo shushi i ta bai dump e den un landfil klandestino. Si no aktua Kòrsou ta haña serunan mes grandi ku Kristòfel pero di shushi. E problemanan i e trabou ta grandi i Gobiernu só no por solushona esaki. Pesei ta importante pa Uni Forsa! Sektor Privá i Sosiedat Sivil mester uni forsa ku Gobiernu pa atende ku shushedat. 

 

Plan pa limpia Korsou i mantene Korsou limpi 

E meta di e diskushon durante di Wellness Weekend i World Cleanup Day tabata pa yuda pensa solushon pa e problema struktural di shushi ku nos tin aki na Kòrsou. Den e kuadro ei, Rudolf de Wit a presentá un plan konkreto pa limpia i mantená Kòrsou limpi “Di Sushi pa Dushi”. Esnan den e Panel a komprometé nan mes pa apoyá e plan i a yega na akuerdo pa uni forsa ku otro gruponan aktivio i forma un kadena pa kontribuí na limpia i mantené Kòrsou limpi. Parlamentario Mc William tin un inisiativa di lei ku ta elimiá importashon di plèstik di un solo uso, kual ya kaba ta un promé paso. Mester eliminá shushedat, mester di kòntròl i lei ku sanshon fuerte pa trese disiplina, patriotismo i amor pa nos naturalesa. E medio ambiente ta importante pa nos ku ta parti di dje por biba mihó i laga un Kòrsou bibabel atras pa nos futuro generashonan. Pronto lo lansa e plataforma Korsou Limpi i Dushi ku lo ta un kolaborashon entre Sektornan Publiko, Priva i Sosiedat Sivil. Intenshon ta pa e Plataforma traha huntu ku e Ministerio responsabel pa tene Kòrsou limpi pa asina logra eliminá shushi, krea un kultura sirkular kaminda nos pueblo ta mas konsiente di kiko e ta husa, resikla, separa shushi i oportunidatnan ku tin pa empresanan ku ta traha riba tereno di medio ambiente. 

Pa wak tur e videonan bek por bishita e Facebookpage di Korsou Salu @KORSOUSALU. Si bo ke forma parti di un of mas di e inisiativanan hasi kontakto via facebook whatsapp, messenger of via e-mail korsousalu@gmail.com.

Tokante Kòrsou Salú

Kòrsou Salú ta un movementu pa konsientisashon riba aspektonan ku ta influenshá nos salú i bienestar. Aplikando siensia, medisina integral i énfasis riba prevenshon nos lo logra un pueblo konsiente, salú, i felís. Na Mei 2021 a lansa e movementu aki pa medio di un konferensia virtual titulá Bo Tripa i Gluten un Enemigu Silensioso? I wikent ku a pasa tabata turno pa Wellness Weekend ku e titulo Sea Inspirá, Sintibu Bon!

Like e page riba Facebook: Kòrsou Salú pa sigui e desaroyonan!