PRONTO E PORTAL DI AQUALECTRA MIKUENTA LO TIN UN KARA NOBO I MAS FASILIDAT PA SIRBI KLIENTENAN AFILIÁ MIHÓ
PRONTO E PORTAL DI AQUALECTRA MIKUENTA LO TIN UN KARA NOBO I MAS FASILIDAT PA SIRBI KLIENTENAN AFILIÁ MIHÓ
Willemstad – 4 di òktober 2021. Mehorashon di e portal MiKuenta ta forma parti di e esfuerso ku Aqualectra ta hasi pa brinda ainda mihó servisio i eksperensia na su klientela. Kontinuashon di digitalisashon di prosesonan, petishonnan i kontakto ku klientenan ta un stap klave den e trayekto di krea e ekspersensha pa e kliente di Aqualectra. Entrante djarason 6 di òktober Aqualectra ta inisiá un proseso pa “upgrade” su portal MiKuent. Relashoná ku e trabounan aki MiKuenta lo ta for di servisio pa usuarionan for di djarason 6 di òktober 5or di mainta te ku djabièrnè 8 di òktober 5or di atardi. Unabes e portal ta bèk den servisio usuarionan por spera un mihó eksperensia. Gradualmente Aqualectra lo introdusí mas inovashon riba su portal di MiKuenta durante e próksimo lunanan. Aqualectra ta urgi klientenan ku ainda no ta usuario di MiKuenta pa apliká awe mes pa por probechá di tur e fasilidatnan ku e portal tin di ofresé dor di bai riba http://www.aqualectra.com i klek riba MiKuenta. E upgrade di MIKuenta ta un di e kantidat di desaroyonan inovadó ku Aqualectra lo bin ta anunsia durante di e próksimo lunanan.
Tur bo asuntunan di utilidat na un lugá i den un fregá’i wowo i fásil
For di e promé mehorashon usuarionan di MiKuenta por spera un kara nobo i mas fasilidat pa por monitoriá i manehá uso di utilidat ainda mas efisiente i responsabel i tambe maneranan mas fásil pa atendé nan transakshonnan di utilidat. Un di e promé kambionan ku usuarionan lo por tuma nota di dje ta ku e gráfikonan di koriente ta funshoná awor optimal. Awor pago hasí pa kliente ta aparesé riba MiKuenta denter di 1 ora despues ku e transakshon wòrdu hasí i no te e siguiente dia manera tabata e kaso te ku awor. Un otro kambio ta ku unabes ku un usuario selektá pa risibí resibu via di meil, e lo no risibí resibu mas na kas via di pòst.
Pronto mas funshonalidat pa fasilitá abo kliente di Aqualectra
Den transkurso di e lunanan ku ta sigui lo introdusí mas kambio na e portal MiKuenta pa sigui mehorá eksperensia di usuarionan. Spera entre otro e posibilidat pa risibí notifikashon via di SMS na momentu ku e resibu di luna sali. Lo bo tin tres eskoho, i por skohe pa risibí resibu solamente via di email, solamente via di SMS òf tantu via di email komo via di SMS. Otro inovashon ku e portal lo ofresé den futuro ta e posibilidat pa yama i risibí kontesta via di un sistema outomatisá, tokante di estado di kuenta habrí, fecha di vensementu di e kuenta, último montante ku a paga, i último fecha ku a hasi transakshon di pago.
E último parti di e proyekto di mehorashon di MiKuenta lo brinda klientenan e posibilidat pa yena formulario pa aplikashonnan ‘online’ pa simplifiká akseso na servisio i prosesashon mas optimal. Esaki lo ta pa apliká pa konekshon nobo, traspaso ora bo ta muda, ets. Unabes kaba ku e ret inteligente di awa i koriente rònt Kòrsou usuarionan lo tin hasta e posibilidat pa mira nan konsumo pa ora i tambe lo por hasi uso di otro fasilitanan avansá ku e sistema di utilidat inteligente ta ofresé.
Un krenchi molèster pero ku hopi inovashon na kaminda
Aqualectra ta pidi diskulpa na usuarionan di MiKuenta pa e momentunan ku e portal lo ta for di servisio ora Aqualectra ta realisá e trabounan pa mehorashon di e portal. Aqualectra lo perkurá pa mantené usuarionan di MiKuenta debidamente informá i aktualisá di e trabounan ku lo tuma lugá. Aqualectra ta konsiente di e molèster, pero ta garantisá nos klientenan mihó eksperensia i mas fasilidat pa atendé ku uso i transakshonnan di utilidat den un fregá’i wowo i fásil. Ta un bon momentu pa klientenan ku no ta usa MiKuenta ainda, pa apliká i sera konosí ku tur e fasilidatnan ku MiKuenta ta ofresé.