PIN: “Tur gremio huntu den un pakto pa kresementu” Medida i yobida di aanslag só, ta un kaya sin salida.

 

Título

PIN: “Tur gremio huntu den un pakto pa kresementu”

Medida i yobida di aanslag só, ta un kaya sin salida.

 

Willemstad — Den su relato 2020 SER a konstatá un inkapasidat kolektivo, un falta di dinamismo, un falta di urgensha pa elemina e bareranan ku ta stanka nos desaroyo. Partido PIN tin miedu ku si mester bai tras dje estilo ‘trankilo-mano’ ku gobièrnu Pisas a atendé ku su promé shen-ti piku dianan, SER lo tin ku pasa e gobièrnu aktual e mes tristu sentensia.

Pa evita esei, komo partido responsabel, PIN ta urgi sr. Pisas pa e sea mes ambisioso ku Franklin Roosevelt tabata den su promé 100 dianan komo presidente Merikano den pleno krísis di añanan ‘30. Sin pèrdè bista p’e aspektonan sosial, segun Partido PIN, e ambishon aki mester konsentrá riba ekspanshon ekonómiko i mas produkshon, paso medida i yobida di aanslag só, ta un hanchi sin salida. Den un kumbre nashonal por yega na palabrashon konkreto pa Kòrsou kuminsa krese atrobe. 

 

Pakto

Tumando vários medida riba e lombanan mas hanchu den salubridat apesar di tur atake, Partido PIN a demonstra di ta konsiente dje nesesidat di medida. Sinembargo no por alimenta komunidat ku mal notisia so. Pesei komo organisashon ku ta kere den e yu di tera dotá, PIN no ta kansa di ripití ku awor si ta ora pa aselerá realisashon di sektornan ekonómiko nobo i regenerashon di esnan ya eksistente. Agrikultura moderno ta un. Kanabis medisinal ta dos. Asina tambe tin turismo di wellness, e-gaming i RDK su trayekto ‘Horizonte Nobo’ pa menshoná algun.

Sinembargo PIN ta sigur ku tin otronan ku tambe tin plannan konkreto, realístiko i benefisioso pa nos ekonomia. Pesei PIN, kompletamente segun e aspekto komunitario di su ideologia humanista-kristian, ta pidi e ekipo ministerial den fòrti pa tuma inisiativa pa yama un kumbre nashonal entre tur gremio di relevansia sosial-ekonómiko. Pa PIN un inisiativa asina ta muestra di madures, konsiderando e magnitut di nos problemanan interno i den reino.

Si adelantá establese puntonan di salida i metanan kla, un kumbre asina no ta pa diskutí asuntunan di tur dia, no ta pa haña rason, no ta pa satisfasé ego, pero lo ta si un plataforma pa tuma desishon riba akshon ekonómiko inmediato i riba hustamente e bareranan ku SER ta menshoná den su relato.

 

Metanan

Segun Partido PIN un kumbre nashonal mester atendé primeramente ku kon ta aktivá e faktornan di produkshon ekonómiko. Den kuadro di esei e kumbre mester kontesta preguntanan manera: 1) a kambio di kiko por stimulá mas hende pa traha sin krea konflikto laboral innesesario? 2) Kua dil mester sera pa konvensé mas doño di kapital pa usa mas di nan fondonan pa invershon di riesgo? 3) Kua kriteria mester aplika pa pone nos rikesanan natural manera tereno, solo i bientu na mas uso produktivo?

Tambe lo ta imperativo pa un kumbre asina disidí riba aselerá digitalisashon transparente di prosesonan formal den e aparato publiko, kuminsando n’e vários trayektonan di pèrmit.

Den aspekto di transformashon sosial, Partido Inovashon Nashonal ta kere ku awor si otronan tambe mester mira ku ya ta ora pa bandoná e modelo di business-as-usual. Si den krisis tur hende keda pará riba nan punto, e lus na horizonte lo no sende nunka. Tur parti di nos komunidat mester aportá segun su forsa. Esnan ku e salarionan mas haltu, doñonan di edifisio, esnan ku derecho di hipotek, sindikatonan, tur meste ta dispuesto pa pèrde awe, pa gana mañan. Anto den e kumbre mester hasi palabrashon kon ta kompensá e dolor, repartí riba vários aña.

Lo ta importante tambe pa un kumbre asina palabrá kon por apliká un lei di apoderashon aunke ta parsial, pa asina por aselerá tomo di desishon. E último punto aki ta pone lus riba e kondishon kardinal pa éksito di un kumbre asina: parlamento mester keda enbolbí den forma di debate i ratifikashon final.

 

Siguientemente

Konsiderando e diferente gremionan i organisashonnan sosial-ekonómiko ku a aserka Partido PIN últimamente, nos ta kere ku tin sufisiente boluntat pa papia i sera dil. Awor ta na gobièrnu Pisas pa pone e kabesnan den nos komunidat huntu pa yega na e desishonnan krusial ku nos sa ku nos pais mester. Ku forsa di boluntat un kumbre asina ta alkansabel prome ku e 2021 sera.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: