4 ekipo na kabes den kampionato di RBI 2021 patrosiná pa MCB

October 25, 2021 REDAKSHON

WILLEMSTAD – Djabièrnè a marka inisio di e segundo fin di siman di kampionato RBI 2021 patrosiná pa Maduro & Curiel’s Bank i bou di ouspisio di Curaçao Basball Development Foundation. Kampionato ta keda dirigí pa Fundashon pa Nan. Tio Daou tabata e esenario un biaha mas pa otro wega kayente entre Firebirds Padres i Royal Scorpions Cardinals. Cardinals tabatin e wega bon dominá ku un bentaha fásil di 7-1 te den di 4 ining. Na e momentu ei Padres a kue un racha bin bek ku 7 kareda di nan mes pa tuma un bentaha di 8-7 den e wega i no a mira patras mas pa bai ku e viktoria. Picher ganador tabata D’veon Sloop i tabatin vários bateadó di Padres ku un hit. Pa Scorpions picher pèrdèdó a resultá Lyendley v/h Kruis i e mes a bai di 2-1 na bate huntu ku Rochandley Cabrera tambe di 2-1 di kual un doblete. Djasabra mainta den e promé wega Wild Cats/St. Michiel Dodgers a gana Suffisant Royals ku skor di 10-7. Nathan Isenia a resultá e picher ganador. Brandon Piña i Cleavon Lasten a bai di 3-2 pa Dodgers. Lasten tabatin un tripel i un honron den e wega aki. Picher pèrdèdó tabata Darion Leandra. Aliander Santana Mieses i Maeverson Francisca a bai di 3-2 pa Royals. Despues Marchena Braves a gana di Sta. Rosa Indians ku skor di 4-1. Picher ganador tabata Chelton Jones i mihó bate pa Braves, Raydjen Rosina di 3-2. Picher pèrdèdó tabata Shurick Mouricia i Caynsherlo Dopwell a bai di 1-1 pa Indians. Finalmente djasabra Royal Scorpions Cardinals a gana di Groot Kwartier Astros ku skor di 7-4. Picher ganador tabata Jaydon Gosepa i Churendrick Inees a bai di 2-2 pa Cardinals. Picher pèrdèdó tabata Najearlon Reinillia i e mes a bai di 2-2 na bate pa Astros. Jared Veeris tabatin un honron den e wega aki.
Den e weganan di djadumingu Firebirds Padres a gana Suffisant Royals ku skor di 12-5. Santa Rosa Indians a gana Groot Kwartier Astros ku skor di 21-5 i Wild Cats/ St. Michiel Dodgers a gana Marchena Braves ku skor di 5-2. Despues di 4 fecha tin 4 ekipo empatá ku rèkert di 3-1.
Kampionato di RBI 2021 patrosiná pa MCB lo kontinuá ku vários wega próksimo fin di siman kuminsando for di djabièrnè na Tio Daou Ballpark. weganan di RBI Curaçao 2021 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook.