Ramon Yung: Kolega Ana Maria bo si tin kaikai bo sa.
Ramon Yung
Kolega Ana Maria bo si tin kaikai bo sa. Bo ta realmente un politiko derechista ku ke keda mantené e komunidat aki mendigo. Paso sin mas bo kier tapa e realidat ku mi a trese padilanti den programa di Francis Grandi Knepa. Bo ta bisa ku segun mi deklarashon, gobièrnu no tin un “toverstok”. Esei berdat mi a bisa, paso realidat ta ku gobièrnu no por drenta i hasi e kambionan “de la noche a la mañana”. Bo ta akusá gobièrnu di tin falta di likides, pasó gobièrnu a entrega su kosnan lat nos no a haña e di 7 “tranche”. Bo ta sigui akusá gobièrnu di a pone beslag riba Capriles siendo ku pais ta den krisis. Bo ta sigui indiká ku hopi hende a hasi trabou pa gobièrnu i no por paga nan. Bo ta konsehá pa gobièrnu i ami komo parlamentario bai traha, stòp di yora i purba tapa wowo di pueblo.
Wèl kolega Ana mi a kaba hasi tur mi trabounan komo parlamentario, pa awor mi tuma mi tempu i splika mi “follower”nan, ku bo pensamentu ta unu realmente di un politiko derechista ku kier sigui sirbi e gremio kapitalista i mantené e pueblo mendigo. DIKON? E echo ku awe nos mester pidi yudansa, ta debí na e maneho ku pa años gobièrnunan ku bo a sostené a aplika e strategia di mendigo dor di krea debe i kontinuamente bati na porta di Ulanda pa yudansa. Esaki ta un strategia pa indoktriná nos pueblo ku ta yudansa di Ulanda so ta nos solushon. NUNKA un partido derechista lo hiba un maneho pa lanta i forma un komunidat pa hisa su outo-estima i haña mas BALOR PROPIO! Pues si NO tabata pa e mal maneho ku boso a hiba, awe nos komunidat lo no tabata den e situashon aktual. Pa loke ta e beslag na Capriles, atrobe ta e maneho deskabeyá di kòrta sin mas den presupuesto a kondusí na e situashon aki. For di dos aña pasá a korta den e presupuesto di Capriles ku konsekuensha ku nan tabata paga trahadónan, pero no tabata kumpli ku pago di impuesto. Boso tabata tapa kara pa tur e realidatnan aki. Boso a skonde tur e realidatnan aki bou di tapeit, anto awor ku Gabinete Gilmar Pik Pisas a drenta i kuminsa pasa basora, TUR e sushinan skondí bou di tapeit ta saliendo. No ta pornada el a papia di un “ROMMEL” den tur ministerio. Ana Maria ta hopi kos mas e pueblo aki lo tende di nan segun nos ta sigui bai. Tene kuenta ku e desaster finansiero na CMC, kual a kosta komunidat 625 mion. Desaster di GIRO, 740 mion. Mal maneho i strategia di manipulashon ku konsekuensha ku Refineria ketu bai ta pará morto. A primintí e trahadónan e di kuater i di sinku tranche di pago, pero ku a resultá di tabata un promesa falsu, ku awe Gabinete Pisas ta atendiendo pa por solushon’é. Manipulashon ku plaka di pueblo den asuntu di NOW i fondo di sosten. NO LUBIDA ku ta e maneho di CHATIGER ku e gabinete anterior kier a aplika, ku Ulanda a disidí di bini ku COHO. Pasó tabata hasi mal uso di e fondonan di pais, sin ku por a responsabilisá esakinan. Pues no ta yora nos ta yora pa tapa wowo di pueblo. Lokual nos ta hasi, ta splika pa konsientisá pueblo riba e realidat due mal maneho ku boso a hiba atrabes di años.