Bonaire ta progresando riba tereno di maneho finansiero

 

 

Bonaire ta progresando riba tereno di maneho finansiero

 

Kralendijk – Kolegio Ehekutivo mester evitá di tin un surplus riba su presupuesto pa fin di aña i Konseho Insular lo mester demonstrá di ta mas desidido den su ròl di buta kuadro. Olegio di supervishon finansiero di Bonaire, Sint Eustatius i Saba (Cft) a indiká esaki den e kòmbersashonnan ku e tabatin ku Kolegio Ehekutivo i Konseho Insular.

 

Komo konsekuensia di e krisis di COVID-19, den e promé mitar di 2021 turismo tabata mas abou ku tabata e kaso den 2019. Esaki tabatin komo konsekuensia ku e entradanan di e isla a sali USD 1,7 mion mas abou ku e montante ku a keda presupuestá. Apesar di esaki, te ku e di dos kuartal, Entidat Públiko Bonaire (OLB) a realisá un surplus, kual a keda okashoná pa e hecho ku a gasta ménos di e fondonan ku tabata disponibel a base di e presupuesto. Cft a pidi Kolegio Ehekutivo un biaha mas pa e ehekutá e presupuesto ku Konseho Insular a aprobá, pa di e forma aki evitá mas tantu posibel ku na fin di aña ta sobra un surplus. Kolegio Ehekutivo a indiká ku e lo hasi tur loke ta den su alkanse pa e minimalisá e surplus riba presupuesto.

 

Maneho finansiero

Bonaire ta progresando riba tereno di maneho finansiero. Akountent a apstené di duna un opinion riba e kuentanan anual di 2020 i a konstatá un poko ménos fayo ku tabatin den e kuenta anual di 2019. Cft a konstatá progreso riba e puntonan prioritario den e karta di e sekretario di estado di Asuntunan di Interior i Relashonnan den Reino di 22 di yüni. Kolegio Ehekutivo a duna un bista den e proseso i e status di e trayekto di mehorashon. Esaki a pone ku Cft a haña un impreshon ku lo tin mehorashon den e kòntròl di e kuenta anual di 2021. Punto di bista di Cft ta ku e yenamentu di e funshonnan importante (direktor di Maneho Operashonal i di Sosten, Hefe di Finansa i Kontroladó di Organisashonnan, ta laga Bonaire dal pasonan importante pa sigui fortifiká e maneho finansiero mas aleu.

 

Presupuesto di maneho

Den e proyekto di presupuesto 2022 OLB pa promé bes a traha un presupuesto di maneho ku ta alineá ku e intenshonnan di maneho den e programa di gobernashon. Cft a duna den e konseho riba e presupuesto ku esaki ta un paso den e bon direkshon, pero ku e proyekto di presupuesto ainda no ta kumpli sufisientemente ku e kriterionan di e lei FinBES i e Dekreto Presupuesto i Responsabilisashon (BBV) BES. Kolegio Ehekutivo na e momento aki ta elaborando e rekomendashonnan di e konseho di Cft, entre kua trahamentu di un nota ‘maneho di riesgo i kapasidat di resistensia’, kual ta indiká =kua parti di e reserva general ta apto pa keda utilisá pa proposishonnan di maneho.

 

Maneho di eksonerashon i maneho di tereno

Den e konseho riba e proyekto di presupuesto 2022 Cft a indiká ku e ta sali for di e punto di bista ku e maneho di eksonerashon i maneho di tereno ta aprobá promé ku 15 di novèmber 2021, di moda ku e presupuesto aprobá di 2022 ta kumpli ku artíkulo 14 di BBV BES. Si Konseho Insular no aprobá e maneho di eksonerashon i maneho di tereno no tuma lugá, OLB no ta kumpli ku su responsabilidat legal manera stipulá den e BBV BES. 

 

Kòmbersashon Bonaire International Airport (BIA)

Den kòmbersashon ku BIA Cft a tuma nota di e plannan di kresementu stratégiko. Ku e plannan aki BIA ta bai traha a base di e kresementu ku ta premirá di turismo i e desaroyo di Bonaire pa e próksimo añanan i lo mehorá kalidat di e fasilidatnan di e aeropuerto.

 

Cft a bishitá Bonaire riba 26 di òktober 2021 i a hiba kòmbersashon ku Kolegio Ehekutivo, Konseho Insular i Bonaire International Airport.

 

 

Click here / Klik aki pa wak kuantu aktividat interesante e muchanan ta hasi https://www.facebook.com/Total-Care-Institute-454507071305043
Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: