MINISTER CIJNTJE TA INSPEKSHONÁ TRABOU DI KAMBIO METER INTELIGENTE DEN ÁREA DI ABRAHAMSZ I SAPATÉ

 

---

---

 

MINISTER CIJNTJE TA INSPEKSHONÁ TRABOU DI KAMBIO METER INTELIGENTE DEN ÁREA DI ABRAHAMSZ I SAPATÉ

Willemstad – Djaweps 4 di òktober Minister di Desaroyo Ekonómiko Ruisandro Cijntje, huntu ku direktornan di Aqualectra, Darick Jonis i Sra. Neysa Isenia a presensiá kambio di e promé meternan inteligente den área di Abrahamsz i Sapaté. Minister Cijntje a ekspresá palabranan di orguyo pa e perspektiva ku e proyekto aki ta brinda na Kòrsou. Aqualectra ta duna Kòrsou aliento ku e proyekto di AMI kaminda ta introdusí meternan inteligente na Kòrsou. Ta trata di un invershon di Nafl 151 mion invertí durante di un periodo di tres aña. E proyekto tin impakto positivo riba ekonomia, kuponan di trabou, transparensia pa e kliente di Aqualectra pa ku su konsumo i tambe desaroyo di e ret di destribushon di awa i koriente di futuro na Kòrsou.

 

Na luna di òktober Aqualectra a anunsiá ku lo kuminsá remplasá meternan di awa i koriente na Kòrsou komo parti di proyekto AMI. AMI ta para pa Advanced Metering Infrastructure kual ta nifiká un ret di distribushon di meternan inteligente. Den e simannan tras di lomba un tim di Aqualectra huntu ku kontratistanan lokal a kumpli ku e promé fase dor di kana di kas pa kas den e área di Abrahamsz i Sapaté pa hasi inspekshon i prepará e área rondó di e meternan di awa i koriente. Den e próksimo simannan lo sigui ku e siguiente fase di implementashon masal kaminda lo kambia e meternan bieu pa e meternan nobo i inteligente. Esaki por kousa disturbio mínimo den suministrashon di koriente den e área. 

 

Durante e proseso di instalashon di e meternan inteligente un tim uniformá i bon identifiká lo pasa pa hasi e inventarisashon di e situashon na kas i despues hasi instalashon di e meter inteligente. Aqualectra lo mantené transparensia dor di komuniká kontinuamente i na tempu direktamente ku e klientenan ku ta na turno pa kambio di meter. Tambe lo notifiká via medionan general di komunikashon kua ta e barionan na turno. Kaminda e meter ta riba tereno òf na propiedat di e habitante Aqualectra lo traha un sita pa pasa. 

 

Despues di implementashon masal den e área di Abrahamsz i Sapaté, Aqualectra lo sigui ku trabounan di inventarisashon i implementashon masal den un otro bario. E proyekto tin un durashon di 3 aña i e meta ta pa instalá meternan inteligente rònt Kòrsou. Ta importante pa koperá ku Aqualectra pa asina e operashon por kana den un paso aselerá i korekto. Aqualectra ta gradisí su klientenan pa koperá pa asina huntu nos krea e ret di utilidat di futuro di Kòrsou.

 

 

---

---