Kasnan di FKP para bashí i/o den mal kondishon!
Kasnan di FKP para bashí i/o den mal kondishon!
Partido Inovashon Nashonal (PIN) a hasi un kaminata den diferente bario kaminda Fundashon Kas Popular (FKP) tin kas of ta manehá kas pa gobièrnu. Nos por bisa ku nos a topa un situashon penoso. P’esei PIN ta puntra kon FKP por tin kas pará bashi òf den estado hopi malu pa falta di mantenshon?
Kasnan di pueblo para bashí
Tur ora ta bin dilanti ku FKP no tin kas disponibel pa pueblo. Tampoko e kasnan na preis sosial. E motibu lo ta pasobra gobièrnu no tin sèn o no tin tereno pa traha kas. Sinembergo ora pasa den e barionan ku FKP tin kas of ta manehá kas pa gobièrnu, nos ta mira kasnan ku ta pará bashi. Nos sa ku ora ku puntra semper FKP ta splika ku e kas ya tin hende pa drenta aden, pero después di tempu nos ta ripará ku e kasnan ta keda bashi. Pa korona e obra, FKP ta buta seguridat pa wak e kasnan, lokual ta kosta un dineral mientras famianan no por haña un dak riba nan kabes.
Kasnan den mal estado di mantenshon
Ademas di kasnan pará bashi, for di bishita serka hendenan den barionan relevante i kombersashonnan ku PIN a hiba ku habitantenan den e barionan, ta sali na klá ku hopi kas falta mantenshon. Bentana i porta kibra, wc ku no ta funshoná, kushina of kashi di kushina foi òrdu, falta di fèrf, ets. Pregunta ta: FKP no tin un plan pa mantenshon di e kasnan?
Kasnan den kua otro hende ta biba ku esun registrá na FKP
Remarkabel ta, ku habitantenan ta informá nos, ku tin kasnan kaminda e habitantenan registrá na FKP a bai biba otro kaminda of baha bai Hulanda, i ta otro hende ta biba den e kasnan. Siendo ku tin hende riba lista di espera ku pa años no ta bin na bùrt.
PIN ta puntra: kon por tin kasnan di FKP para bashi?
Direktor di FKP semper ta bisa, ku ta gobièrnu no ta koperá ku sufisiente fondo ni tereno i ku ta p’esei su trahadónan no por yuda e miles di hendenan ku ta inskribí pa años kaba riba e lista di espera.
Si e argumento aki ta korekto mes, e no ta splika kon por ta ku FKP por tin kasnan para bashí anto tin tantu hende ku nesesisat di un kas. Tin kasnan ku ta den un bon estado, dikón no ta hinka e hendenan ku sufisiente punto den e kasnan aki?
Awor aki tin 2 kompleho den e bario di St. Jago / Swan ku ta birando spookhuis, chòl house, pasombra kasi no tin habitante den nan. Na Rif tin kasnan pará bashi, na Moochiweg tambe, ets. Dikón FKP no ta hinka suidadanonan ku mester di kas den e kasnan para bashi aki? Kiko e maneho di FKP pa ku e kasnan pará bashi ta? Ta laga nan sigui deteriorá, pa despues pidi gobièrnu plaka di e pueblo pagadó di belasting pa bolbé drecha nan? Ta e kos nan aki ta pone ku e pueblo ta disgustá i ta aserká nos di PIN pa buska solushon!
Petishonnan na minister di VVRP
PIN ta pidi minister di VVRP, pa:
- Laga hasi un inventarisashon di e kasnan di FKP òf bou di su maneho pa determiná:
- kuantu kas tin pará bashí i na unda;
- kuantu kas tin hende aden ku no ta e persona registrá komo tal na FKP;
- estado di mantenshon di e kasnan.
- A base di e inventarisashon introdusí un maneho ku akshonnan konkreto
i mará na tempu, dirigí pa hinka hende según e lista di espera, den e kasnan pará bashí.
- Traha un Plan di Mantenshon, mará na tempu di kasnan di FKP of bou di maneho di FKP
Nota finansiero
Nos no ke tende e argumentu ku gobiernu no tin sèn mas. Pa sèn tin solushon! Debí na e echo ku FKP ta un fundashon ku tin basta kas ta kai bou di dje, e por buska un fiansa na un interes abou na nos bankonan lokal, ku hasta tin dimás likídes. Di e moda aki FKP ta generá e medionan nesesario pa por drecha e kasnan. Un ekstra benifisio ta, ku en bes di sèn keda pará na banko, e ta bai pa material di konstrukshon i kontratisanan i asina hende ta haña trabou i ekonomia ta lora.
Konklushon
Nos di Partido Inovashon Nashonal (PIN) ta mira e importansha pa gobièrno atendé ku FKP, pa asina yuda e pueblo pa por haña un kas. No ta akseptabel ku ketubai tin kasnan para bashí. Además no ta akseptabel pa kontinuá ku e deskuido di mantenshon di e kasnan habitá.
