Firebirds Padres ku dos viktoria den RBI 2021 i ta firme na promé lugá
Firebirds Padres ku dos viktoria den RBI 2021 i ta firme na promé lugá
WILLEMSTAD – E bataya entre e dos ekipo nan ku solamente un wega pèrdí den e aktual kampionato di RBI 2021 patrosiná pa Maduro & Curiel’s Bank tabata e klímaks di e wikènt tras di lomba. E kampanaso entre Firebirds Padres i Wild Cats/St. Michiel Dodgers tabata e promé di e shete weganan programa. Tantu Padres komo Dodgers a drenta e wega aki ku rèkert di 7-1 pero tabata e ekipo di Padres ku tabata superior ganando ku skor di 13-3. Tabata ining number 3 ku tabata fatal pa Dodgers permitiendo 9 kareda. Ku e viktoria aki Padres ta nan so na promé lugá ku bista kaba riba play-off nan. Pa e wega aki picher ganador tabata Djenoir Mogen miéntras ku Clarence Martina a bai di 3-3 na bate pa Padres. Picher pèrdèdó tabata Cleavon Lasten i Nahiem Mutueel a bai di 3-3 pa Dodgers.
Den e promé wega di djasabra Groot Kwartier Astros a sorprendé e ekipo di Sta. Rosa Indians ku skor grandi di 14-3. Picher ganadó tabata Tristan Calmes i Terrence Martis a bai di 4-3 miéntras ku Najearlon Reinillia i Daysheron Luciano a konektá honron pa Astros. Picher pèrdèdó pa Indians a resultá Gion Oleana mientras ku Nyzar Martins-Pereira a bai di 1-1 na bate. Den di dos wega djasabra Marchena Braves a gana Royal Scorpions Cardinals ku skor di 7-4. Picher ganadó tabata Nwigher Francisca miéntras ku Raydjen Rosina i Tha-Vish Doran a bai di 3-2 na bate pa Braves. Picher pèrdèdó tabata Lyendley v/h Kruis i seis bateadó a bai di 2-1 pa Cardinals. Den último wega di e dia Firebirds Padres a kontinuá ku nan rumbo viktorioso ganando di Suffisant Royals ku skor di 12-2. Picher ganador tabata Clarence Martina i tres bateadó a bai di 2-1 pa Padres. Pa Royals e picher pèrdèdó tabata Vienerick Francisca i Aliander Santana Mieses a konektá e úniko hit.
Djadumingu mainta Marchena Braves a gana Wild Cats/St. Michiel Dodgers 12-10. Picher ganador tabata Raydjen Rosina i 4 bateadó a bai di 2-1 na bate pa Braves. Picher pèrdèdó tabata Keorden Leito i Nahiem Mutueel a bai di 3-3 na bate pa Dodgers. Despues Groot Kwartier Astros a nòkout Suffisant Royals 16-0. Picher ganador tabata David Raap i Najearlon Reinilia a bai di 3-2 ku un honron na bate pa Astros. Picher pèrdèdó tabata Alexys Snel i Kyran Flores tabatin e úniko hit pa Royals. Finalmente Royal Scorpions Cardinals a blankea e ekipo di Sta. Rosa Indians ku skor di 11-0. Picher ganador tabata Jaydon Gosepa i mihó bate pa Cardinals tabata Nazir Fernandez i Elian de Jesus Payano ámbos di 1-1. Picher pèrdèdó tabata Shurick Mouricia i mihó bate pa Indians Nyzar Martins-Pereira i Jurvenier Rijnschot ámbos di 1-1.
Despues di e weganan aki ya tres ekipo a klasifiká pa playoff i e último ekipo lo keda determiná e próksimo fin di siman. Padres, Braves i Dodgers ta aden. Sea Indians, Cardinals of Astros lo bira e di kuater ekipo. Atenshon speshal tambe mester bai pa e hóben pelotero Nahiem Mutueel ku a bai di 6-6 den fin di siman tras di lomba.
Kampionato di RBI 2021 patrosiná pa MCB lo kontinuá ku vários wega determinante a playoff próksimo fin di siman kuminsando for di djabièrnè na Tio Daou Ballpark. Weganan di RBI Curaçao 2021 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook.