Minister di Salubridat, Medio Ambiente i Naturalesa (GMN), sra. Drs. Dorothy Pietersz Janga a tuma nota di algun artíkulo ku a sali den medionan di prensa kaminda e karta ku e la duna instrukshon na “vereffenaar” nan di SBZV, sr Edsel Rosenda, sr. M.R. Christina i sr. F. Semper pa para prosesonan den korte pa asina hasi un investigashon imparsial riba fondonan di SBZV for di e periodo di promé ku 2011 te ku aworakí.

November 23, 2021 REDAKSHON

Minister di Salubridat, Medio Ambiente i Naturalesa

Sra. Drs. Dorothy Pietersz-Janga

Minister di GMN ta lamentá ku e karta aki a lèk den prensa i medionan sosial, dunando informashon no korekto rondó di e karta. Pa e motibu ei Minister di GMN ta haña ku ta na su lugá pa aklará e motibu di su karta na “vereffenaars” nan.

Ta asina ku den e desishon di nombramentu di e direktiva di 2013 tin reglá den artíkulo 3 ku e miembronan di direktiva, ku segun statutonan mester sigui instrukshon di Minister di GMN. Pues e punto ku e “vereffenaars” nan no ta sigui instrukshon di Minister ta inkorekto.

Ta asina tambe ku na momentu ku eks-minister Ben Whiteman a duna instrukshon pa disolvé e fundashon (konforme artíkulo 11 di statutonan di e fundashon) “vereffenaars” nan a wòrdu nombrá pa maksimal 18 luna. E periodo aki a vense, pa ta mas eksakto dia 15 di desèmber 2016.

Komo direktiva anterior i tambe komo “vereffenaar”, nan a haña komo tarea pa rekuperá dañonan ku e fundashon a sufri komo konsekuensia di posibel inkumplimentu di parti di tersera nan i investigá eventualmente e iregularidat ku a wòrdu hasí di parti di e direktiva 2011-2013.

Debí ku e nombramentu komo “vereffenaar” a kaduká for di desèmber 2016 e kasonan den korte kontra sr. Abdala, sr. Yarzagaray i sr. Jourdain hasí na 2018 no ta outorisá.

Konforme artíkulo 11, insiso 5 di e statutonan di e fundashon, ta Minister di GMN ta disidí kiko ta pasa ku fondonan i kon ta distribuí e patrimonio despues di likidashon di bienesnan di e fundashon.

Promé ku a sinta ku “verffenaars” nan dia 4 di novèmber 2021, Minister a pidi e kuenta nan anual for di aña 2015 bin ariba. Konforme artíkulo 8 di statuto nan e direktiva i/òf “vereffenaars” nan mester entrega e kuenta nan ouditá tur aña na Minister di GMN. Esaki for di 2015 no tabata e kaso, i Minister ta di opinion ku esaki mester a tuma lugá.

E “vereffenaars” nan a entregá un konsepto di e kuenta nan anual di 2015-2020 ku no ta ouditá. E sifra nan ta mustra ku e fundashon ta práktikamente bankarota.

E konsepto di e kuentanan anual 2015 – 2020 ta mustra ku no tin un saldo positivo.

“Vereffenaars” nan a indiká na Minister ku nan ta wardando e kasonan den korte kontra direktiva 2011-2013 pa asina kaba ku e sifra nan. Pero esaki tambe ta kontra e statutonan.

Sr. Abdala i Sr. Yarzagaray a bai den apelashon kontra desishon di korte di promé instansia kaminda a kondena nan na pago di 4. mion. Den apelashon direktiva a pidi 10 mion kontra Sr. Abdala i Sr. Yarzagaray. Konforme e “tussenvonnis” di 24 di ougùstùs 2021, Hof a baha e demanda di antemano kontra Sr. Abdala te 2 mion i kontra Sr. Yarzagaray te un máksimo di 3 mion.

Pues asta si “vereffenaars” kobra e 5 mion aki, ainda e fundashon ta keda den bankarota mirando e posishon di likides di e fundashon manera e konsepto di e kuenta anual 2015 te 2020 ta indiká.

Por último Minister di GMN a pidi pa para tur kasonan andando den korte pa loke ta referí fundashon SBZV, pa asina Minister di GMN por hasi un investigashon riba e maneho di 2011 te ku aworakí.