google.com, pub-5639114718427035, DIRECT, f08c47fec0942fa0

Minister Cijntje lo partisipá na e di 12 konferensha Ministerial di World Trade Organization na Ginebra

Minister Cijntje lo partisipá na e di 12 konferensha Ministerial di World Trade Organization na Ginebra

Geplaatst op 26 November 2021 dor di Ministerio Desaroyo Ekonómiko

 

Próksimamente Kòrsou lo dal un stap mas serka di miembresia independiente den WTO

WILLEMSTAD – Minister di Desaroyo Ekonómiko, sr Ruisandro Cijntje  lo liderá un delegashon di Kòrsou ku ta biaha próksimamente pa partisipá na e di diesdos konferensia ministerial (MC-12) di World Trade Organization (WTO) na Ginebra, ku lo tuma lugá di 30 di novèmber te ku 3 di desèmber próksimo. E konferensia ministerial akí ta e órgano di mas haltu den WTO. E konferensia ministerial di WTO ta tuma lugá kada dos aña i ministernan enkargá ku komersio internashonal di 164 pais rònt mundu ta bini huntu ku 25 otro paisnan ku ta miembro opservadó pa deliberá i tuma desishonnan importante tokante komersio internashonal.

Partisipashon di minister Cijntje na e konferensia ministerial di e aña akí ta èkstra importante, pasobra for di mart 2020 e Konseho General di WTO a bai di akuerdo pa Kòrsou bira miembro opservadó di WTO. Durante di e konferensia di e aña akí lo ta e promé biaha ku un minister di Desaroyo Ekonómiko di Kòrsou lo sinta na mesa representando Kòrsou durante di e deliberashonnan den e reunion komo un pais responsabel pa su propio maneho di komersio internashonal. Durante e konferensia akí, Minister Cijntje lo tin un enkuentro ku diferente otro minister i representante di paisnan importante pa Kòrsou su komersio internashonal, manera Hulanda, Estádos Unídos, Union Oropeo i tambe representantenan di paisnan ku Kòrsou aktualmente ta òf próksimamente lo negoshá tratadonan bilateral di komersio ku nan, manera: Colombia, Repúblika Dominikana, Trinidad & Tobago i Sürnam.
Tur esakinan lo yuda konkretisá e meta di e minister di Desaroyo Ekonómiko, kual ta pa Kòrsou bira miembro di WTO, komo teritorio aduanal independiente den Reino.

E petishon pa bira miembro independiente di WTO ya ta den proseso for di e momentu ku Kòrsou a wòrdu aseptá komo miembro opservadó den e organisashon na mart 2020. Na e mesun momentu ei, e Konseho General di WTO a instalá tambe un grupo di trabou, ‘Accession Working Party’ (AWP), pa eksaminá e petishon di Kòrsou pa bira miembro independiente di WTO. Una bes Kòrsou kumpli ku e kondishonnan ku WTO ta mara na e miembresia akí, e presidente di e AWP por plania, huntu ku sekretariado di WTO, e promé reunion di e AWP pa kuminsá e negosiashonnan entre Kòrsou i e 164 miembronan di WTO. Te na e momentunan aki, Kòrsou ta kanando segun skema i ta spera ku e negosiashon nan lo kuminsá den e promé kuartal di 2022. “Nos ta spera di konkluí e negoshashon di tal manera ku pa desèmber 2023 nos por bira miembro independiente di WTO” minister Cijntje ta indiká. Den e kuadro akí minister Cijntje lo hiba kombersashonnan tokante e inisio di e negosiashonnan ku e presidente di AWP, Embahador Chad Blackman, Representante Permanente di Barbados na WTO i tambe Direktor General Suplente Xiangchen ZHANG i su departamento di ‘Accessions’ durante e di Diesdos Konferensia Ministerial di WTO.

Pa mas informashon tokante WTO por bishitá www.wto.org.

Share this page to Telegram

This site uses Akismet to reduce spam. Learn how your comment data is processed.

%d bloggers like this: