AQUALECTRA TA KUMINSÁ KU KONSTRUKSHON DI PROMÉ EDIFISIO NOBO

December 8, 2021 REDAKSHON

AQUALECTRA TA KUMINSÁ KU KONSTRUKSHON DI PROMÉ EDIFISIO NOBO

Willemstad 7 di Desèmber 2021 – Djamars 7 di Desèmber Aqualectra a kuminsá ku konstrukshon di Edifisio C, kual ta e promé di e dos edifisionan nobo ku e kompania lo konstruí na Nieuwe Haven.

Ku konstrukshon di Edifisio C, Aqualectra ta krea un fasilidat rendabel ku elementonan duradero pa su empleadonan, ku mira riba e nesesidatnan di futuro, i alabes e trabounan di konstrukshon ta duna un impulso na ekonomia di Kòrsou. Minister Cooper, Minister Cijntje, Minister Martina, CEO di Aqualectra Darick Jonis i CFO di Aqualectra, Sra. Neysa Isenia konhuntamente a duna e señal pa e trabounan di konstrukshon kuminsá, durante e seremonia ofishal ku a tuma lugá na Nieuwe Haven.

Minister di Tráfiko, Transporte i Planifikashon Urbano Sr. Cooper durante di su diskurso a sorprendé esnan presente ku e informé ku Gobièrnu su disponibilidat pa Aqualectra manehá e ret di e lusnan di kaya rònt Kòrsou. Minister Cooper resientemente, huntu ku EOP, a otorgá Aqualectra e pèrmit pa por inisiá e trabounan di konstrukshon di Edifisio C. E Minister Cooper mas alew a rekonosé e esfuerso di Aqualectra, i e abilidat di sigui pusha pa dilanti ku kurashi pa trese inovashon, prinsipalmente den un periodo ku Kòrsou tin más mester di e tipo di inisiativanan aki. Minister Cijntje di Ministerio di Desaroyo Ekonómiko tambe a pone enfasis riba e impakto ekonómiko ku e konstrukshonnan di Aqualectra lo trese. Aqualectra ta invertí 7 mion florin den e konstrukshon di e edifisio na Dòkweg Nieuwe Haven. Minister Cijntje a gradisi tambe e finansiadonan pa nan konfiansa demonstrá den Aqualectra.

Huntu ku CEO i CFO di Aqualectra, e mandatarionan a hasi e asina yamá ‘Groundbreaking’, riba un manera outomátiko, kual ta karakterisá e direkshon stratégiko di Aqualectra pa trese mas inovashon den su fasilidatnan i servisio. Seguidamente, huntu ku representantenan di CIBC FirstCaribbean i MCB, a desvelá e bòrchi di konstrukshon ku outomobilistanan por mira ora nan pasa e edifisio di Aqualectra na Nieuwe Haven.

Aqualectra a drenta den un akuerdo ku CWM, ku lo realisá e trabounan di konstrukshon di Edifisio C.

E diseño ta di Studio 8. E edifisio nobo na Dokweg lo ta simpel i rendabel, pero alabes lo inkorporá aspektonan modèrno i duradero pa medio di uso di material i diseño ku por wanta kalor afó, p’asina mantené un klima fresku, i tambe lo inkorporá elementonan pa spar uso di energia, entre otro panel solar.

Lo implementá tambe un sistema di ventilashon adekuá pa areanan di trabou kaminda ta traha den gruponan chikí òf grandi, kual ta promové un airu fresku den henter edifisio i protehé salú di e empleadonan di Power Supply Chain ku lo laborá den e ofisina. Alabes lo krea un esfera di traha agradabel, modèrnu i flèksibel. Konstrukshon di Edifisio C ta planiá pa finalisá den transkurso di 2022.