Spich – Minister Charles Cooper – Okashon Aqualectra

 

DISKURSO MINISTER COOPER
MINISTERIO DI TRANSPORTE, TRÁFIKO I PLANIFIKASHON URBANO
Aqualectra
Djamars 7 di Desèmber 2021
• Bon tardi Honorabel kolega Ministernan;
Hunta di Komisario, Gerensha, invitadona presente.
• Pa mi ta un plaser i honor di por dirigí mi mes na boso,
awe, durante e evento aki, kaminda huntu nos ta selebrá
e konstrukshon di e ofisina ‘Edifisio C’ ku lo akomodá e departamentu Power Supply Chain.
• E paso aki ta katalisá mas desaroyo importante na Aqualectra,
ku lo tin un gran impakto riba bienestar di nos komunidat di Kòrsou.
• Novèmber último,
komo Minister di Transporte, Tráfiko i Planifikashon Urbano,
mi tabatin e responsabilidat di otorgá e pèrmit di konstrukshon pa e promé di e dos edifisionan
ku Aqualectra lo konstruí na Nieuwe Haven: Edifisio C.
• Huntu ku departamentunan bou di mi Ministerio, nos a realisá e trabounan nesesario,
pa finalmente por a otorgá Aqualectra e pèrmit pa por konstruí ‘Edifisio C’.
• Ta importante pa boso ta konsiente di e impakto ku e desaroyo aki lo tin
a korto í a largo plaso, pa nos suidadanonan, nos ekonomia i e kalidat di servisio i utilidatnan
ofresé den nos pais.
• Nos ta rekonosé e esfuerso di Aqualectra,
i e abilidat di sigui pusha pa dilanti ku kurashi pa trese inovashon.
Prinsipalmente den un periodo ku Kòrsou tin más mester di e tipo di inisiativanan aki.
Den 2021, Aqualectra ta invertí den un edifisio modèrno i duradero,
ku ta duna espasio na inovashon den infrastruktura i na un manera di traha mas progresivo,
i asta mi por bisa ehemplar den e normal nobo na Kòrsou.
• Mi ta bisa ehemplar, pasobra e edifisio ta trahá ku un karákter modesto,
E ta simpel i rendabel.
• Pero na mes momentu inkorporando tur aspekto nesesario ku ta hasié progresivo, ku míra riba e
nesesidatnan di futuro:
-E edifisio lo spar energia pa medio di energia solar i e material i diseño ku ta wanta kalor afó;
-A tene kuenta tambe ku ventilashon i espasio den e edifisio, pa promové airu fresku den henter
e edifisio, esaki ku e salú di Aqualectra su empleadonan na mente;
-i asina tin mas ehèmpel ku ta hasi e edifisio aki ehemplar pa esnan ku lo konstruí den futuro.
Mi ta deseá hopi éksito na e empleadonan di departamentu Power Supply Chain, ku lo fungi
komo ehèmpel positivo, tantu den Aqualectra, komo rònt Kòrsou.
• Promé ku mi finalisá, mi’n por keda sin enfatisá ku e trabounan di konstrukshon
lo duna un gran impulso na ekonomia di Kòrsou.
Durante e periodo ku lo konstruí e edifisio na Dokweg, e trabounan di konstrukshon lo krea un
bon kantidat di kupo di trabou pa medio di kontratistanan den konstrukshon i kompanianan ku
lo implementá elementonan duradero.
• Esaki ta e impakto ekonómiko a korto plaso.
• A largo plaso nos ta satisfecho di mira kon Aqualectra ta kolaborá ku nos ministerionan i
institutonan pa bin ku pasonan ku lo benefisiá nos komunidat den futuro.
Aqualectra den futuro serkano lo kuminsá traha riba su di dos edifisio na Nieuwe Haven i
fasilidatnan den otro area, pa krea espasio den ‘prime locations’ di nos pais,
kual ta e areanan di Rif i Mundu Nobo, p’asina Kòrsou por sigui desaroyá e areanan aki ku
proyektonan ku lo duna un impulso positivio na ekonomia di Kòrsou.
• Ta un inspirashon pa mira, ku no opstante e situashon ekonómiko di nos pais,
yüist pa stimulá e situashon ekonómiko di nos pais,
Aqualectra lo krea espasio pa mas paso den areanan klave,
kual lo kumbiní desaroyo ekonómiko pa nos pais, na bienestar di komunidat di Kòrsou.
• Mi ke finalisá felisitando tantu Aqualectra komo Kòrsou ku e logro aki.
Un paso di kurashi di nos kompania di awa i koriente
lo sigui inspirá i motivá kompanianan rònt Kòrsou
pa invertí den bienestar di nos país ku míra pa futuro.
• Pabien!

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: