Akuerdo di Gobernashon Ulandes, tremendo oportunidat pa Kòrsou
Willemstad 15 di desèmber 2021
Titulo: Akuerdo di Gobernashon Ulandes, tremendo oportunidat pa Kòrsou
Awe, eksaktamente 67 aña despues ku nos a firma Statuut pa Reino Ulandes, Partido Inovashon Nashonal (PIN) a tuma nota ku satisfakshon di e Akuerdo di Koalishon Ulandes yamá: “Omzien naar elkaar, vooruitkijken naar de toekomst”. Den e akuerdo entre e partidonan polítiko VVD, D66, CDA i CU tin algún punto sumamente alentador pa fortifikashon di outonomia i ekonomia di Kòrsou. Ta importante pa nos para ketu na e oportunidatnan ku e akuerdo ta brinda i hasi uso di e posibilidatnan konkreto aki.
Futuro kompartí den reino basa riba prinsipionan di Statuut
E promé punto ta, e rekonosementu ku nos ta kompartí un pasado i un futuro! Un futuro ku nos mester duna kontenido huntu. E akuerdo ta rekonosé ku despues di 10 aña di stagnashon ekonomiko i e slanan di un orkan i un pandemia, Ulanda mester sosten’é tres paisnan den Karibe pa logra un kresementu duradero. E akuerdo ta sali for di e prinsipionan di Statuut, esta igualdat i reprosidat (un yuda otro) entre e paisnan i e pensamentu pa eksplorá honestamente deseonan pa yega na un eventual adaptashon di Statuut. E partidonan ku ta bai forma e gobiernu nobo di Hulanda ta dispuesto pa traha huntu ku e paisnan den Karibe riba e areanan di “bon gobernashon:, “lucha kontra korupshon” i “fortifikashon di ekonomia” i “fortifikashon di enseñansa”. Remarkabel ta, ku nan ke atendé ku e “defisit demokratiko” na momento di atendé ku leinan di Reino dor di duna espasio pa un bos proporshonal di e paisnan di Karibe den Tweede Kamer i ademas ke fasilitá nos partisipashon na elekshon di parlamento Europeo.
Komo PIN nos ta dispuesto pa partisipá den un komishon entre e paisnan di Reino pa atendé Statuut den kuadro pa duna mas partisipashon na e paisnan di Karibe den e proceso pa atend’e ku leinan di Reino.
Garantia i fondo pa desaroyo ekonomiko sostenible i duradero
Ta importante ku e akuerdo ta stipulá ku Hulanda ta pone pa desaroyo ekonomiko di Kòrsou e fondonan di garantia di Rijksdienst voor Ondernemend Nederland (RVO), e Nationaal Groeifonds i tambe e argeglo pa desarroyo di produkshon di energia duradero (SDE++) disponibel pa nos pais. Ta bon pa studia e posibilidatnan aki:
- Rijksdienst voor Ondernemend Nederland (RVO)
Gobiernu Ulandes ta garantisa por medio di “Garantie Ondernemingsfinanciering (GO)” 50% di fiansanan, lokual ta baha riesgo di e banko lokal privá i hasi e finansiamentu lokal di e proyekto posibel. Ta trata di invershonnan duradero, den área agrariko, empresanan inovativo, i tambe internashonal.
- Nationaal Groeifonds
Kabinete Ulandes a pone € 20 miliard disponibel pa proyektonan den Reino pa proksimo 5 aña, ku meta pa kresementu ekonomiko struktural i sostenible manera a) desaroyo di i konosementu b) investigashon, desaroyo i inovashon i c) infrastruktura.
- Areglonan pa desaroyo di produskshon di energia duradero(SDE++)
E SDE++ ta destiná pa empresa i institushonnan sin fin di lukro, por ehempel den área di transporte, agrikultura etc. Esaki pa stimula produkshon di energía sostenible i redukshon de CO2 ku ta afektá nos klima.
Proposishonnan urgente i konkreto di PIN
PIN ta proponé diferente akshon urgente na e diferente aktornan den nos komunidat ku por pusha un agenda di rekuperashon ekonomiko.
- Gobiernu pone un tim di eksperto di Ministerio di Desaroyo Ekonomiko (MEO) studia e areglonan aki i spesialisá nan mes pa por sostené e petishonnan for di sektor priva riba e fondonan aki.
- Sektor privá traha un tim, ku inklushon of riba inistiativa di Kamera di Komersio, pa duna sostén na aplikashon di e posisbilidatnan aki
- Bankonan lokual laga algún empleado spesialisá nan mes den e areglonan aki pa por guía nan klientenan den uso di e areglonan aki, ku na mes momento ta negoshi pa e bankonan tambe.