Eliminá sangura pa evitá malesa ta un deber di nos tur

 

Eliminá sangura pa evitá malesa ta un deber di nos tur

Willemstad – Servisio di Salú Públiko di Kòrsou (UO G&GZ ántes GGD) den kuadro di kombatimentu di sangura ta bolbe enfatisá riba e importansia pa eliminá lugánan di brui di sangura prinsipalmente durante i despues di áwaseru. E sangura ku nos konosé ku strepi blanku ku pretu ta e sangura ku yama Aedes aegypti i ku ta e sangura ku ta kousa e.o. otro Dengue, Chikungunya, Zika i/ òf tambe Keintura hel (Gelekoorts) dor di un piká di e sangura muhé. E sanguranan aki ta biba mei mei di nos i ku nos laga nan, nan ta reprodusí masha rápido paso un sangura por pone mas ku 400 webu.

Na Kòrsou servisio di G&GZ no a risibí ningun kaso konfirmá di e malesanan ariba menshoná ainda, pero si nos no intervení na nos mes kas ta kuestion di tempu i oportunidat pa e sangura plama e malesanan menshoná. Esaki no kiermen ku nos mester sinta warda riba kasonan pa nos haña nos ku un epidemia. Ta p’esei nos (komunidat) mester tuma akshon dirigí den nos kas i tambe rondó di kas i den kurá. Esaki ta konta tambe pa negoshinan ku ta hasi hopi uzo di kosnan ku por wanta awa.

AKSHON NA KAS  

• Kontrolá paden di kas pa bo no tin pòchi mata ku awa aden den kual sangura por pone webu. Por evitá esaki dor di remplasá e awa ku tera òf kambia e awa un biaha pa siman. Kontrolá e skòter bou di pòchi di vas; pone santu òf tera den e skòter. Aquarium ku awa pará sin piská aden tambe por sirbi komo lugá kaminda sangura por pone webu aden. Pone piská den esaki. Por último semper por tuma ABATE na Piscaderaweg 49 pa trata awa pará. 

• Kontrolá pafó di kas dor di kana rònt den kurá. Paga bon tinu kamindanan ku ta skur i sukú manera bou di palu kaminda por tin artefaktonan manera hèmber, bleki, tayer, bòter, foam di kuminda, kos di hunga i hasta baki di awa pa kachó.  Por hasi lo siguiente:  Tira lokual bo no uza afó. Kaminda no por eliminá esaki, bora esaki den e bòm di manera awa no por keda pará òf yena esaki ku tera.  
• Kontrolá renbak òf baki di fangu awa di áwaseru. Mihó kos ta pa pone piská den e baki òf renbak. 
• Si akaso bo ta uza barí òf kònteiner di plèstik pa fangu awa, tira abate den nan.
• Kòrda riba “goot” ku por tin blachi aden i ta wanta awa. Limpia esaki. 
• Berpùt ku ta habrí òf ku skèrnan kaminda bo no por mira, tambe ta sirbi komo lugá pa sangura pone webu. Laga sera esakinan hermetikamente. Tambe por flush kerosin den berpùt. 
• Protehá bo mes kontra piká di sangura dor di hunta bo kurpa ku repelente ku ta kontené e kímiko DEET. Por haña esaki na botika i supermerkadonan. 

AKSHON PA NEGOSHINAN   

 

• Lugánan kaminda tin industria di bendementu di outo segunda mano, kontratista, lasmentu, boteyamentu, lugánan di flor mester evitá ku tin kosnan pará ku awa aden.   
• Tayer ku awa aden ta forma un lugá perfekto kaminda sangura gusta pone su webunan aden. Tayer ta skur i e awa su temperatura den e tayer ta perfekto pa sangura. Lugánan di tayer mester pone tur tayer bou dak òf tira tayernan ku no tin uso afó.      

 

Sangura ta e yabi pa pasa e malesanan di Dengue, Chikungunya, Zika i tambe Keintura hel (Gelekoorts). Gobièrnu so no por kaba ku sangura. Sangura por keda eliminá si nos eliminá tur kos kaminda sangura por pone webu aden. Hasi bo parti.

 

Pa mas informashon òf pa duna un keho tokante sangura por yama, mail òf WhatssApp Departamentu di Kòntròl di Sangura na Piscaderaweg 49, Mundu Nobo.

Telefòn : 432 2867

WhattsApp : 527 0854

Email : infogmn@gobiernu.cw