PROMÉ MINISTER GILMAR PISAS A HASI ENTREGA DI SERTIFIKADO NA 13 KURSISTA DI BANKÈT.

PROMÉ MINISTER GILMAR PISAS A HASI ENTREGA DI SERTIFIKADO NA 13 KURSISTA DI BANKÈT.

 

Willemstad – Promé Minister Gilmar Pisas a hasi entrega di sertifikado na 13 kursista di Bankèt dia 17 di dezèmber 2021 na Buurtcentrum Otrabanda.

 

Pa medio di fondonan ku Gobièrnu a pone disponibel pa finansiá e proyektonan di bario, 13 kursista a logra di finalisá e kurso di Bankèt.

E kurso aki a dura 3 luna, i e tabata un biaha pa siman.

Durante di e kurso e kursitanan por a haña e oportunidat pa siña entre otro kon pa traha Bolo, Pan, Pastechi, Empana, Ayaka, Pan Dushi, kos di boka dushi i hasta dòrna Bolo.

 

Promé Minister a ilustrá durante su diskurso ku e Gobièrnu aktual ta aploudí e tipo di proyektonan aki, debí ku nan ta yuda realisá algun di e metanan stratégiko den e Akuerdo di Gobernashon. Ta trata aki di e metanan pa hasi posibel pa kada suidadano por tin un entrada fiho, tin un nivel i kalidat di bida haltu i pa asina ta den e posishon di por logra tur su metanan.

 

Promé Minister a felisitá kada un di kursitanan ku e gran logro aki. E la motivá kada un pa nan no bai sinta, pero pa prepará nan mes bon, i ranka sali mesora ku nan propio negoshi i/òf buska oportunidat pa traha den un negoshi ku por hasi bon uso di nan eksperensianan atkerí.

 

Promé Minister a gradisí gerensia di Reda Sosial tambe ku tabata e kordinadó di e proyekto eksitoso aki.