Komandante en hefe: wak mas leu ku bo nanishi i amplia e tim di krisis awó.

 

Komandante en hefe: wak mas leu ku bo nanishi i amplia e tim di krisis awó.

Mester atendé ku Covid-19 di forma integral.

 

Nèt promé ku pasku di nasementu, e fiesta spiritual i familiar mas grandi den nos pais, e viro di COVID-19 ta tene nos den su gara un biaha mas. Den pasado Partido PIN a pidi pa ámplia e tim di konsehero pa kombatí i manehá COVID-19. Banda di e ekspertonan ku konosementu di desaster i epidemiología, mester pone profeshonalnan di diferente disiplina.  Esaki lamentabelmente no a sosodé. Awor Komandante en Hefe por hasi un diferensha.

 

Mes maneho ku país a hiba for di prinsipio di 2020 no ta sufisiente!

Entretantu e pandemia a kontinuá i nos tur a mira diferente variante di e viro desaroyá. Gobièrnunan mundialmente ta bou di hopi preshon pa mantené nan komunidat habri i na mes momentu mas limpi posibel di e viro i su mutantenan. Na Kòrsou sinembargo Komandante en Hefe ta keda hiba mes maneho ku país a hiba for di prinsipio, esta: bakuná òf booster; medidanan di higiena i di no-aglomerashon. Pa nesesario ku e medidanan aki ta, nan no ta brinda perspektiva na un komunidat den kua bida mester sigui. E pandemia no ta bai stòp por lo pronto.

 

Evitá vishon di tùnel i rabia

Komandante en Hefe, promé minister Pik Pisas, komo esun ultimo responsabel, mester evitá vishon di tùnel, hansha, rabia i frustrashon. Hopi hende ta biba ku hansha i miedu pa e malesa mes. Huntu ku esei ta bin depreshon, violensha físiko i seksual den kas, pèrdida di trabou, problema finansiero i pobresa. Mas ku nunka ta importante pa tur e aspektonan di salú haña atenshon. Pesei mester aserká salú di forma holístiko.

 

Aserkamentu integral

E organisashon mundial di salú, WHO, ta definí 7 área interelatá di salú pa tene kuenta ku ne:

  1. Emoshonal: kon nos ta atendé ku nos emoshonnan?
  2. Intelektual: kon nos ta enbolbí ku nos desaroyo intelektual, nos ta krese?
  3. Físiko: Kon e diferente aspektonan físiko manera fleksibilidat i forsa di e kurpa ta?
  4. Nutrishonal: nos ta kome balansá? Kon ta pará ku nos uso di suku i alkohòl?
  5. Sosialmente: kon fuerte nos amistatnan ta i nos por traha amistanan nobo?
  6. Spiritual: nos ta sinti ku nos bida tin sentido ainda?
  7. Finasiero: nos tin entrada, i si tin, nos ta usa nos entrada bon i spar pa futuro? 

 

Komo partido di inovashon, PIN ta konvensí ku gobièrnu mester wak mas leu ku su nanishi i paga atenshon na mas ku solamente medidanan di bakunashon, booster, hygiena, distansia sosial i anti-aglomerashon!  Klaro ku e medidanan ei ta nesesario, pero keda pegá einan so, sin tene kuenta ku e otro aspektonan internashonalmente rekonosé, lo resulta den mas hansha, rabia i frustrashon. Mester traha un Plan di maneho di Covid-19 ku ta tene kuenta ku tur aspekto di salú huntu ku ekspertonan di diferente disiplina i respresentantenan di komunidat pa nos por dil huntu ku e situashon difísil ku nos ta bibando aden pa kasi 2 aña kaba.

 

Kombatí hansha, rabia i frustrashon

Tur e aspektonan di salú ta nesesario pa atendé k’un maneho di termino largu di e viro Covid-19. No supestimá e sintimentunan di rabia i frustrashon ku ta biba den pueblo i bin ku un maneho ku ta duna aliento, maske ku tempu ta difísil.

 

Rekomendashonan:  tim multi disiplinario i Plan di maneho pa tempu largu

  1. PIN ta úrgi Komandante en Hefe pa nòmbra un tim multi disiplinario pa konsehá ku un bista amplio riba e atendementu ku e medidanan pa kombatí i manehá e viro. E tim por konsistí entre otro di e siguiente profeshonalnan: e kordinador médiko nashonal; e líder operashonal; un sientífiko den área di salú (gezondheidswetenschapper); un mikrobiologo; un virólogo; un internista-intensivista; un sosiologo; un sikólogo; i un trahador sosial.  
  2. Na di dos luga PIN ta úrgi Komandante en Hefe pa enbolbí komunidat den formulashon di un Plan maneho pa tempu largu. Traha un plan huntu ku e tim multidisiplinario, e ministerionan di gobièrnu i representashon di sektor di enseñasa; empresarial, spesífikamente hotel, horeca i farándula; arte; deporte; sindikato, konseho di iglesia i otronan. E plan mester tene kuenta ku mas ku solamente kapasidat pa atendé hende ku Covid-19 den hospital. Meta di e plan mester ta pa evitá mas “lockdown”. Determiná huntu ki ora ta implementá kua medida pa hasi nos komunidat bibabel pa tur hende.
Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: