GRANDIOSO INISIO DI LITO CHALLENGE 4 VS 4! 19 DI DEZÈMBER 2021 NA TERENO DI FFK!
GRANDIOSO INISIO DI LITO CHALLENGE 4 VS 4! 19 DI DEZÈMBER 2021 NA TERENO DI FFK!
Djadumingu tras di lomba a tuma lugá e promé edishon di Lito Challenge 4 vs 4.
FFK den kolaborashon ku MCB a yega na e inisiativa pa introdusí Lito Challenge 4 vs 4. Esaki ta un torneo pa e futbolistanan di kategoria U-8 (muchanan bou di 8 aña) kaminda lo tin diferente partido ku 4 hungadó ta hunga kontra otro pa despues saka un ganadó. Pues tur hungadó mester a inskribí di manera individual i no komo ekipo p’asina partisipá na e torneo aki.
E meta di e torneo ta pa duna mucha muhé i mucha hòmber di vários ‘background’ ku ta pertenesé na e kategoria aki, un plataforma pa sera konosí ku e deporte di futbòl i dibertí huntu ku otro mucha na vários manera den un ambiente sano i deportivo.
Durante e Lito Challenge e partisipantenan lo siña:
- Kon anda ku otro
- Responsabilidat
- Optené kurashi
- Respetá outoridat
- Kon pa dil ku kambio
- Perseveransia
- Kon pa anda ku emoshon
- Honestidat
- Disiplina
- Haña amigunan nobo
- Komprondé manego di tempu
- Pasa tempu dushi ku otro
Durante e promé edishon di Lito Challenge un total di 40 hungadó a partisipá na diferente partido kontra otro riba 4 tereno chikí. E hungadónan aki a bin di diferente ekipo manera; Atletiko Saliña, Sithoc, Scherpenheuvel, C-stars United, Centro Juve, Stallions i Excellence. Tambe ta tin diferente hungadó ku no ta forma parti di un ekipo ainda mirando ku esaki no tabata un eksigensia pa por partisipá. E hungadónan a hunga bruá den ekiponan chikí ku tabata hunga kontra otro i kada bes tabata kambia di ekipo. Esaki pa asina nan por konosé diferente karakter i adaptá nan mes kada biaha na un otro alineashon di ekipo. Tur mucha a hunga 4 wega i por a gana punto abase di resultado di e weganan, 15 pa un wega ganá, 10 pa un empatá i 5 pa un wega pèrdí, huntu ku e kantidat di golnan anotá. Na final di e partidonan a saka 5 ganado ku a risibí un bunita medaya komo rekuerdo.
Ganadónan di e promé Lito Challenge a resultá:
- Chariondrick (Centro Juve) ku 90 punto
- Sofia (Excellence) 84 punto
- Mazen (C- Stars) 79 punto
- Remy (Centro Juve) 76 Punto
- Z’Thom (Schervenheuvel) 74 punto
Masha pabien na tur e hungadónan aki i éksito pa e siguiente Lito Challenge!
FFK ta hopi kontentu i orguyoso ku despues di dos aña sin por a organisá Liga Lito debí na Covid, tòg por a duna un ñapa di loke ta bai bini na 2022. For di yanüari te yüni lo organisá diferente evento. Pues keda pendiente pa mas di e torneonan aki den 2022.
FFK ta gradisí tur partisipante, tur klup i naturalmente Maduro & Curiel’s Bank pa a hinka su skouder un biaha mas bou di e proyekto aki i kontribuí na e formashon di nos futuronan di mañan.
23 desèmber 2021
