KOMUNIKADO DI KUERPO POLISIAL KÒRSOU: Kashi ta kai riba beibi di un aña i okashoná su morto

Kashi ta kai riba beibi di un aña i okashoná su morto
Djadumingu 26 di desèmber 2021 alrededor di 21.03or, Sentral di Polis a dirigí un unidat pa un adrès na Juan Domingo, kaminda tabata reina un konsternashon debí na un aksidente ku a kaba di tuma lugá ku un beibi.
Na yegada di e unidat, el a komprondé ku algun ratu promé, un familiar a bai den kamber na unda un beibi di un aña tabata drumi den un kama di yu.
Una bes den kamber, e familiar a konstatá ku e beibi aki tabata drumí bou di un kashi ku lo mester a kai riba dje.
Mesora tata di e kriatura ku a tuma nota ku e yu, no tabata reakshoná, a sali kuné direkshon di CMC den un outo partikular.
Sinembargo, na yegada na hospital, dòkter na warda no por a hasi nada mas pa e kriatura Lexton Lucas Mauris nasé 4 di yüli 2020 na Kòrsou.
Riba òrdu di fiskal di Ministerio Públiko a konfiská e kurpa pa mas investigashon.
Reshèrshinan tékniko i táktiko ta investigando mas leu.