Torneo Fabb kanselá pa di dos aña sigui pa Covid
Torneo Fabb kanselá pa di dos aña sigui pa Covid
WILLEMSTAD – Fin di siman próksimo mester a marka inisio di e tradishonal Torneo di Fabb pero lamentablemente pa di dos aña sigui esaki mester keda kanselá. Mirando e desaroyo dje pandemia aktual, e kresementu kontinuo di kasonan aktivo di Covid ademas e medidanan di Gobièrnu di Kòrsou, Fundashon Akademia di Baseball Brievengat (FABB) mester a tuma e desishon ya menshoná. Pa e hóbennan ku ta mira dilanti pa hunga den e torneo aki ta un desapunto ku atrobe mester kanselá e evento tan gusta kual ta e “Torneo FABB”. E torneo aki ku ta konta normalmente ku partisipashon di mas ku 16 ekipo i mas ku 200 hóben praktikando nan deporte faborito di beisbòl lo a tuma lugá di 7 pa 30 di yanüari 2022. “Nos ta lamentá esaki pero seguridat ta keda e prioridat pa nos tur. Nos ta spera ku pa siguiente aña 2023, nos ‘Torneo FABB’ por tuma lugá.” Di parti di organisashon di Fundashon Akademia di Baseball Brievengat (FABB) ta deseá un i tur un Bon Komienso di aña 2022 i ku salu na promé lugá i sperando ku pronto por sigui práktika deporte i beisbòl bek.