PROMÉ MINISTER GILMAR PISAS A REUNÍ VIRTUALMENTE KU SINDIKATO SGTK HUNTU KU RDK
PROMÉ MINISTER GILMAR PISAS A REUNÍ
VIRTUALMENTE KU SINDIKATO SGTK HUNTU KU RDK
Willemstad – Promé Minister Gilmar Pisas a reuní virtualmente ku Sindikato SGTK hunt ku representantenan di Refineria di Kòrsou (RdK) dia 11 di yanüari 2022.
Esnan ku a representá e Sindikato ta sr. Alcides Cova i sr. Harms.
Esnan ku a representa RdK tabata srs. Patrick Newton ((Direktor interino di RdK) i Elvis Quarton (Presidente Komisario di RdK).
Durante di e reunion a skucha tur e puntonan ku e Sindikato SGTK kier a trese dilanti, kualnan tabata entre otro e posibilidat di pago di algun luna di plaka na e trahadonan di Kontratista, ku ta sin entrada, i pa ki tempu por tin trabou pa e trahadonan aki atrobe.
Di parti Gobièrnu a splika ku pa por yega na e trámite pa duna trahadonan algun luna di plaka tin mester di un base hurídiko, loke no tin aktualmente. Un otro aspekto ta ku e trahadonan di Kontratista no tabata den servisio di Refineria Isla, CRU òf RdK.
Promé Minister a pidi e Sindikato pa bini ku un konseho hurídiko pa ku kon si por duna e trahadonan di Kontratista algu tanten ku nan no tin trabou.
Pa ku oportunidat di trabou a splika na e Sindikato ku aktualmente tin 13 kompania di Kontratista, masomenos 70 hende, ta trahando den Refineria Isla i ku pronto lo bai krea mas oportunidat pa trabou, kaminda mas trahadó di Kontratista por haña trabou.
Di parti RdK a spliká ku a usa e sistema di “bidding” pa asina por a baha e gastunan i lo trata di hala algun proyekto mas dilanti, pa asina pronto por tin mas trabou pa nos hendenan.
Di parti di RdK a bini dilanti tambe ku esaki ta e di 4 reunion ku ta sinta ku e Sindikato SGTK i ku lo sigui ta habrí pa komuniká ku e Sindikato riba e desaroyonan ku tin rondó di nos Refineria.
Promé Minister tambe a sinta varios biaha kaba ku e Sindikato; dos biaha ku e Sindikato, un biaha separá ku algun miembro di e Sindikato i tambe awor di dos biaha ku e Sindikato huntu ku RdK.
E reunion a kana den un bon esfera kaminda Promé Minister, e Sindikato i RdK por interkambiá di opinion i kompartí informashon ku otro.