For di mas di 20 kompania ku a mustra interes KOMPANIANAN SELEKTÁ PA MANEHÁ I OPERÁ NOS FASILIDATNAN PETROLERO TA HASIENDO ESTUDIO PRELIMINAR I BISHITA NA FASILIDATNAN

 

For di mas di 20 kompania ku a mustra interes

KOMPANIANAN SELEKTÁ PA MANEHÁ I OPERÁ NOS FASILIDATNAN PETROLERO TA HASIENDO ESTUDIO PRELIMINAR I BISHITA NA FASILIDATNAN

Willemstad 20 di yanüari 2022 – For di 20 kompanianan ku a mustra interes pa manehá i operá nos fasilidatnan petrolero, e komishon enkargá ku e búskeda pa un operadó pa nos fasilidatnan petrolero a hasi un selekshon di kompanianan ku ta sigui den e proseso di selekshon pa yega na un partner finalmente.  E kompanianan ku a keda selektá aktualmente ta hasiendo nan evaluashon preliminar, dor di entre otro hasi uso di informashonnan inkluí den e dokumentu  inisial “Teaser” ku nan a risibí kaba huntu ku un pakete di informashon tokante di e refineria.   

E kompanianan tin akseso tambe na e data-room virtual di RdK.   Den e data-room virtual nan por optené informashon i datonan adishonal tokante di nos fasilidatnan petrolero.  Por spera tambe ku durante di e próksimo simannan tin bishitanan di representantenan di kompanianan na nos refineria i terminal na Bullenbaai. Durante di e bishitanan aki, Gerensha di refineria i e komishon enkargá ku e búskeda pa un operadó pa nos fasilidatnan petrolero lo tene tambe presentashon tokante di entre otro operashon i mantenshon di e refineria, rekurso humano i asuntunan tokante medio ambiente.

  

Manera ta konosí, fin di aña pasá e komishon enkargá ku e búskeda pa un operadó pa nos fasilidatnan petrolero, a pidi un asina yamá “Expression of Interest” di kompanianan ku por ta interesá den maneho i operashon di nos refineria.  E meta ta pa no mas tardá ku fin di febrüari risibí di partidonan selektá un “binding proposal”.  Esaki kiermèn ku direktamente despues lo por skohe e partido òf partidonan ku ta negoshá ku’né pa yega na un akuerdo.

RdK na e momentu aki lo no por duna deklarashon tokante di ningun partido enbista di e akuerdo di konfidenshalidat ku tin firmá ku kompanianan ku a keda selektá.  Ta bon pa enfatisá ku un ambiente ku menos spekulashon tokante posibel kandidatonan lo kontribuí na un atmósfera ku ta deseábel pa ta reina durante di un tipo di proseso kompliká asina’ki.  

RdK lo sigui informá segun e proseso ta kana i na su debido tempu kompartí nòmber di potenshal partner den operashon i maneho pa nos fasilidatnan petrolero.

Share this page to Telegram

This site uses Akismet to reduce spam. Learn how your comment data is processed.

%d bloggers like this: