Partido MAN Konsiderando e situashon den CMC MESTER USA SEHOS KOMO LOKASHON PA PERSONA DI COVID
Partido MAN
Konsiderando e situashon den CMC
MESTER USA SEHOS KOMO LOKASHON PA PERSONA DI COVID
Mester sigurá kuido regular pa nos komunidat
Frakshon di MAN a hasi bishitá na SEHOS ku e mira pa funshoná komo un sentro hospitalario pa personanan kontagiá di COVID-19.
E situashon di COVID aktualmente ta di hopi preokupashon serka nos di Frakshon MAN.
Na e momento aki e situashon ta asina alarmante ku kuido elektivo a wòrdu un biaha mas para, pa motibu di e kantidat di persona den kuido intensivo i tambe e falta di personal pa traha.
Pa Frakshon di MAN nos mester buska manera pa atende ku COVID den hòspital, pero tambe sigui duna kuido elektivo na nos komunidat.
Despues di e bishita na na SEHOS i e rekorido ku nos a hasi ta mustra ku nos tin un situashon uniko aki na Kòrsou kaminda tin un hòspital bieu banda esun nobo. Ku esaki ta brinda e oportunidat pa e dos lokalidatnan aki funshoná komo sentro hospitalario i ku por atende e situashon di Covid. Pa asina evitá ku e posponememtu di operashonnan elektivo no ta kosta nos mas sèn ku e paso pa hasi SEHOS e sentro di kalamidat pa e virus aki.
Tambe den futuro por konsiderá pa hasi SEHOS e sentro di kalamidat pa hòspitalnan di Islanan BES, Aruba i St Maarten pa asina yuda baha nan preshon den nan hòspitalnan.
Despues di mas o menos 2 aña ku nos tin den e situashon di pandemia, nos mester yega na manera kon ahusta i atende ku e situashon pero keda brinda kuido elektivo/ rutinario na nos komunidat. No por ta asina mas ku kuido elektivo no por kontinua. E situashon aki ta un preokupashon pa diferente pashènt ku ta bati na nos porta. Kaminda ta un preokupashon pa kada unu ku no sa ki dia e oportunidat ta presentá pa nan por hasi operashon.
Nos frakshon ta manda un karta ku algun pregunta pero tambe ku e petishon pa hasi algu na e situashon aktual ku ta unu preokupashon. Pero sigur e petishon pa hasi SEHOS un sentro hospitalario pa duna e kuido pa persona kontagia ku Covid i laga na CMC e kuido rutinario/elektivo kontinua.