Diferente diploma i sertifikado otorgá na empleado di bombero na Saba, Sint Eustatius i Boneiru
Tur aña empleado di Kuerpo di Bombero Hulanda Karibense (BKCN) ta partisipá na entrenamentu i kurso pa mantené su konosementu i abilidat na nivel. Riba Dia di Bombero, dia 4 di mei último, e komandantenan lokal di Boneiru a otorgá un kantidat grandi di sertifikado i diploma na diferente kolega. Esaki tabata trata di entrenamentu i kurso relashoná ku brantwer i no-relashoná ku brantwer.
Ademas, henter e kuerpo a haña un entrenamentu aña pasá pa asina por ta na altura di e último konosementu- i téknikanan pa kombatí insidente. Ya a duna sertifikado pa esaki. E komandantenan lokal di Boneiru ta orguyoso di nan personal i ta felisitá e koleganan ku a logra haña su diploma i sertifikado den diferente área durante e último periodo.
Kuater empleado na Saba a logra resientemente pasa su entrenamentu pa bira shofùr operador di pòmp. E entrenamentu aki ta prepará e bomberonan pa manehá e vehíkulo di bombero i pa operá e pòmp durante kombatimentu di kandela i operashon di reskate. A entregá e diplomanan aki tambe riba ‘Firefighters Day’, dor di komandante lokal Every:
“Ta tremendo pa mira nos bomberonan sigui krese i kontribuí na siguridat di nos komunidat. Mi ke animá nan pa sigui siña i deseá nan éksito den nan karera na BKCN”.
Empleadonan na Sint Eustatius tambe a selebrá Dia Internashonal di Bombero. Riba e dia aki un kolega a risibí su diploma pa logra e entrenamentu di shofùr operador di pòmp.
E desaroyo kontinuo di personal ta un punto sentral na BKCN. E komandantenan kier sigui stimulá i motivá nan koleganan pa sigui pone paso den nan karera.
