Mester pidi outorisashon pa bishitá un skol

Mester pidi outorisashon pa bishitá un skol

WILLEMSTAD – Ministerio di Enseñansa, Siensia, Kultura i Deporte (ESKD) ta informá
ku kada bishita na un skol mester keda organisá konforme e reglanan vigente, e reglanan
aki no ta regla ku Minister Sithree van Heydoorn a introdusí, pero ta reglanan ku semper
tabata tei. Ta asina ku pa bishitá un skol públiko mester pidi outorisashon na e direktiva
di e skol.
Direktiva di skolnan públiko tin reglanan ku nan mester tene nan mes na djé pa por laga un
persona òf organisashon drenta skol. E meta di e reglanan ta na promé lugá pa protehá e
privasidat di mucha, maestro/dosente i salbaguardiá seguridat na skolnan. Espeshalmente

awor aki ku mester tene kuenta ku e reglanan vigente relashoná ku e pandemia di COVID-
19. Tambe un parti importante di esaki ta pa enseñansa keda duna den trankilidat, komo ku

hopi biaha un bishita por trese distraishon i interupshon na e proseso di enseñansa. P’esei
esaki mester keda prepará di forma ordená i asina minimalisá e interupshon ku un bishita
imprevisto por kousa. Tambe ta na su lugá pa previo na un bishita puntonan di agènda
keda palabrá pa ambos partido, pa garantisá ku e interkambio di informashon ta kompletu i
korekto, i kaminda ta nesesario tur aktornan relevante ta presente.
Resientemente un parlamentario a trata na bishitá un skol sin ku e Direktiva di Skolnan
Públiko i e Kabes di Skol konserní a ser poné na altura na tempu pa asina por hasi e
preparashonnan. Esaki a pone ku e bishita no por a sigui komo ku e Direktiva di e Skolnan
no a prepará esaki huntu ku e funshonarionan, ni tim di maneho konserní ku ta responsabel
pa e skol. Semper Direktiva di e Skolnan mester perkurá pa garantisá e kontinuidat di e
proseso di ensenansa.
Ministerio di Enseñansa, Siensia, Kultura i Deporte huntu ku Direktiva di Skolnan Públiko
semper ta habrí pa duna informashon i ta aploudí tur insiativa pero esaki semper mester
kana konforme e reglanan vigente. Pa mas informashon den kuadro di bishita na skol por
tuma kontakto ku e Direktiva di Skolnan Públiko na T: 466 6111 òf via di mail E:
info@dos.edu.cw.