Miembro Trabou Pa Kòrsou TPK, Abigail Boelijn Trùknan ku ta transportá karga sin kubri No por warda te dia baka hoga na pos!

Miembro Trabou Pa Kòrsou TPK, Abigail Boelijn

Trùknan ku ta transportá karga sin kubri

No por warda te dia baka hoga na pos!

 

Trabou pa Kòrsou TPK a bin ta tuma nota diariamente riba kareteranan di Kòrsou, tantu den bario i kareteranan prinsipal, trùknan di santu, greis i shushi ku ta hasi transporte den nan baki patras sin protekshon i/o sin kubri esaki pa protehé otro outomobilistanan.

 

 

 

Esaki a para bira manera algu normal, pero ta algu hopi peligroso. Sigur ku tur e burakunan ku nos tin riba nos kareteranan. Kualke opheto ku kai riba un “windshield” ta “bonochi paga lus”. Paso depende kon e opheto kai riba un “windshield” bo no ta mira nada mas. Djis imaginá si glas kai den bo wowo, pio ahinda, e daño ku esei por trese pa bo bista pa restu di bo bida. Sin papia mes di e gastu ku lo bo ta bai tin pa kumpra un “windshield” nobo.

 

Otro punto ta ku ora saku di plastik o otro shushi bula bai kai riba via públiko, e shofùrnan no ta para na banda i rekohé esaki. Masha mal bista pa nos mes i nos turistanan.

 

Durante aña nan 2007-2008 tabata tin kontròl pisá ku tabata wòrdu hasí na Bapor Kibra, kaminda nan tabata parti but, pa esnan ku sali for di e tereno kaminda nan ta kue santu pa sigui ku nan trabou. Awendia Kuerpo Polisial Kòrsou tin HIT TEAM ku ta enkargá ku e kontròlnan aki. Ministerio di Salubridat (GMN) tambe tin ‘X-TEAM’. Kiko a kambia? Awor nos tin mas tim pero menos kontròl ?

 

Inkluso bo para na “Landfill” i hasi un kontròl lo buta ku tur hende lo tapa nan shushi. Paso riba e ruta niun hende no ke stòp pa para tapa shushi , pues nan lo skohe pa tapa esaki promé nan kuminsa transportá e shushi.

 

No ta hopi trabou pa protehé bo outomobilistanan. Paso hopi dòmtrùk tin e ‘zeil’ pegá na e trùk. Pero hopi di e trùknan mas chikí i ‘pick-up’ no tin esaki. E lokual tin ku pasa ta pa spuit e santu i tapa tantu esaki komo e shushinan ku tapol. Nada difisil. E asuntu aki ta para den lei tambe. ‘Landsverordering Openbare Orden (L.O.O.) 2015 Artikel 15 lid 1a t/m d’, e ta transparentemente skibi, kisas na hulandes, pero e ta skibí.

 

Ku ta prohibí sin pèrmit di Minister di VVRP pa kore riba kaminda públiko ku shushi gròf, santu i hopi otro kos mas ku ta sali for di e transporte sin protekshon. Nos di Trabou Pa Kòrsou TPK ke sa kiko Ministernan di Hustisia i i Salubridataktual ta bai hasi ku e situashon ku a bin ta ripití su mes hopi últimamente.

 

Pesei nos di Trabou pa Kòrsou TPK a pidi nos líder polítiko Sr. Rennox Calmes, dirigí un karta na Ministernan di Hustisia i Salubridat pa atendé ku ‘HIT TEAM’ i ‘X-TEAM’ promé ku baka hoga na pos.

 

Trabou pa Kórsou TPK tei pa traha pa Kòrsou, sea den gobièrno of nò. Nos kurason ta bati pa Kòrsou

Share this page to Telegram

This site uses Akismet to reduce spam. Learn how your comment data is processed.

%d bloggers like this: