PREPARASHONNAN TA KONTINUÁ PA NOS SELEKSHON FEMENINO SU PARTISIPASHON NA E 2022 CONCACAF WOMEN’S QUALIFIERS! NOS REFUERSONAN A YEGA KÒRSOU!

PREPARASHONNAN TA KONTINUÁ PA NOS SELEKSHON FEMENINO SU PARTISIPASHON NA E 2022 CONCACAF WOMEN’S QUALIFIERS!

NOS REFUERSONAN A YEGA KÒRSOU!

 

 

Preparashonnan ta kanando pa nos selekshon nashonal femenino senior su promé enkuentro kontra Guatemala den e 2022 CONCACAF Women’s Qualifiers.

E partido aki lo tuma lugá djasabra binidero 19 di febrüari 2022 pa 6’or di atardi den stadion Rignaal ‘Jean’ Francisca.

 

Manera ya nos a avisá nos selekshon ta konta ku un grupo di refuerso ku a bin for di Hulanda i Merka p’asina fortalesé nos selekshon durante e torneo aki. Un grupo di 6 hungadó lo djòin nos selekshon di kual e promé grupo a yega awe ‘tardi mitar di 3 i e sobrá hungadónan tambe a yega awe mas lat, al rededor di 3’or di atardi.

 

Ta trata di Marelly Balentina ku ta hunga den Regent University Royals i Kadisha Martina di Brewton-Parker College aya na Merka. Jeleaugh Rosa i Sadéyah Rosa ku ta militá den Sparta, Fellicity Verhagen ku ta forma parti di Feyenoord i por último Kiara Angelino ku ta den Sporting 70 na Hulanda. E 6 hungadónan aki huntu ku e sobrá 14 hungadónan ku ta militá den diferente ekipo aki na Kòrsou, lo siguí prepará pa duna un bon bataya durante nan próksimo kompromisonan.

 

Awor ku tur nos hungadónan residensiá den eksterior a pisa suela di Kòrsou den oranan di awe atardi pa djòin nos hugandónan lokal, nos lo kontinuá ku e ‘training’ i preparashonnan pa nos partido di djasabra aki.

Nos ekipo ta kompletu i kla pa saka nos kara un biaha mas den e 2022 CONCACAF Women’s Qualifiers.