Gobièrnu di kòrsou tin debido atenshon pa e situashon na wacawa, banda abou

Gobièrnu di kòrsou tin debido atenshon pa e situashon na wacawa, banda abou

 

Willemstad – Gobièrnu di Kòrsou tin debido atenshon pa e situashon na Wacawa, Banda Abou.

 

Promé Minister Gilmar Pisas huntu ku Minister di Salubridat, Medio Ambiente i Naturalesa Dorothy Pietersz-Janga i nan konseheronan, a reuní ku e Federashon Koperativanan Uní di Produkshon, Fundashon Viba, Piskadonan di Wacawa i nan konsehero dia 1 di mart 2022.

Den e reunion aki Promé Minister a duna tur ku tabata presente oportunidat pa a splika ampliamente riba e situashon ku tin aktualmente na Wacawa.

E puntonan ku mas a resaltá durante di e reunion aki tabata:

1. Kantidat di dia ku Defensa/Marina Real ta train na e lugá;
2. Seguridat pa ku e Piskadonan su bida;
3. Impakto riba nos Medio Ambiente;
4. Pèrmitnan ku ta nesesario pa hasi sierto práktikanan na Wacawa.

 

A palabrá ku lo yama un reunion ku e representantenan di Defensa/Marina Real pa asina huntu por yega na un solushon pa e situashon na Wacawa.

 

Dia 4 di mart 2022 a sigui un reunion kaminda tabata presente Promé Minister Gilmar Pisas, Minister di Tráfiko, Transporte i Planifikashon Urbano Charles Cooper, Federashon Koperativanan Uní di Produkshon, Fundashon Viba, Piskadonan di Wacawa i nan konsehero, konsehero di Ministerio di Salubridat, Medio Ambiente i Naturalesa (GMN) i konseheronan di Promé Minister.

 

Durante di e reunion aki a trata di trese e partidonan huntu pa por yega na un solushon ku por benefisiá tur esnan ku ta enbolbí den e situashon aki.

Despues di a skucha tur esnan ku tabata presente a yega na e siguiente palabrashonnan:

1. Lo instituí un grupo di trabou ku lo bai sigui traha riba proposishonnan konkreto pa trese kambio den e situashon aktual na Wacawa. E grupo aki lo reuní djarason dia 9 di mart 2022;
2. Den e grupo di trabou lo tin representashon di Federashon Koperativanan Uní di Produkshon, Defensa/Marina Real, Fundashon Viba, Piskadonan di Wacawa i nan konsehero, konseheronan di GMN i di Promé Minister;
3. Lo bai bishitá Wacawa pa por tuma nota personalmente riba e situashon aktual;
4. Di parti di Defensa/Marina Real tin di kuminsá hasi e petishon pa e pèrmit nesesario pa por sigui ku e proyektonan na Wacawa. Ta trata aki di entre otro e “hindervergunning”. E petishon pa e pèrmitnan di “aanlegvergunning” i “bouwvergunning” ya a keda entregá na e respektivo departamentunan di Gobièrnu.

 

Ambos reunion (dia 1 i 4 di mart 2022) a kana den un bon esfera i tur ku tabata presente a mustra disponibilidat pa koperá pa asina yega na un solushon duradero ku por benefisiá tur esnan enbolbí.