DURANTE FIN DI SIMAN PUEBLO A SALI Y CELEBRA ARUBA SU CULTURA DEN GRAN FORMA

DURANTE FIN DI SIMAN PUEBLO A SALI Y CELEBRA ARUBA SU CULTURA DEN GRAN FORMA

 

ORANJESTAD – Diasabra y diadomingo a tuma luga e di 19 edicion di “Festival Un Canto pa Aruba su Himno y Bandera”, riba Plaza Libertador Betico Croes. Prome Minister Evelyn Wever – Croes a hiba palabra na e ocasion y a expresa palabra di gradicimento na tur participante, publico y organisador cu ta contribui na engrandece Aruba su cultura.

 

E celebracion cultural a inicia desde siman pasa cu e Parada Nacional, caminda cu hendenan a bini hunto pa celebra cu poco poco ta bek na normalidad. Prome Minister Evelyn Wever – Croes a expresa cu e concierto cultural nacional cu a tuma luga diasabra y diadomingo tabata realmente un regalo enorme pa cada un ciudadano di nos Pais. Tabatin cantantenan riba escenario desde edadnan hopi chikito, hobennan y adultonan.

“Tur participante a duna un presentacion increiblemente bunita. Ta gradici tur areglista, compositor, bandanan, cantantenan, mayornan y tur esnan cu a yuda cu preparacion pa e buntita presentacionnan cu realmente ta yena nos curason.”

Ta haci apelacion na radionan y medionan di comunicacion pa haci uzo di tur e canticanan bunita cu a scucha e dos dianan aki, y tocanan cada dia te cu 18 di maart. Door di toca y presenta e canticanan na radio, ta duna bek na e cantante y compositornan, cual sigur nan merece.

 

Prome Minister a gradici Sr. Harry Croes kende ta un baluarte di cultura di Aruba y cu ta organisa e festival aki exitosamente pa hopi tempo. “Ta aprecia tur locual cu e ta haci pa cultura y pa Aruba en general.”

 

Premier Wever – Croes a termina gradiciendo pueblo cu a yena Plaza Libertador Betico Croes pa celebra Aruba su himno y bandera pa disfruta di e presentacionnan bunita, pero tambe pa a come cuminda crioyo, cos dushi tipico, artesania y mas, cu ta representa nos dushi Aruba.