WILLEMSTAD- Durante un anochi amenó pa hungador nan di Marchena Braves di klase AA na Bam Bam Tech Sport Zone, Presidente nobo di e ekipo di Marchena Braves, Eldrion Regina a presentá plan nan nobo pa aña 2022 pa e ekipo.

Situashon finansiero di pais Kòrsou no ta pasando den e mihó momentu, i esaki ta reflehá tambe riba kantidat di spònsor i yudansa ekonómiko ku e tim ta risibí. Sinembargo esaki no ta stroba kreatividat pa sigi traha pa laga e hungador nan resaltá, i pa huntu traha na un tim fuerte ku ta kla pa temporada nobo di beisbòl na yüni 2022.

Den kuadro di esaki, Marchena Braves a risibí tremendo yudansa di Hensley “Bam Bam” Meulens, i tur djamars i djaweps e tim di Marchena Braves lo train e parti di bateo i treinen di teknika na Bam Bam Tech Sport Zone. Durante di e anochi, Marchena Braves a gradisí Hensley Meulens tambe pa e aporte i sosten na e organisashon, i direktiva di Marchena Braves a regalá Hensley Meulens un pèchi firmá dor diferente hungador nan di Braves.

Otro bon aporte ku sigur e tim di Marchena Braves ta kontentu kune, ta ku tur djasabra mèrdia lo tin treinen di kondishon di fisiká na Cons Fitness situá na F.D.Rooseveltweg. Durante 1 ora tur hungador lo risibí guia profeshonal pa traha riba e kondishon fisiko ku tambe ta importante pa prestashon den beisbòl.

E ekipo di Marchena Braves tin diferente proyekto i planes pa aña 2022, i pa logra diferente meta lo tin vários fundraising tambe ku e tim lo organisá riba termino kòrtiku. Lo tin benta di sòpi, benta di truk di pan dor di Marchena Braves mes, i diferente otro forma nan pa yega na fondo.

Na final di e anochi, despues ku tur informashon a ser kompartí, Presidente di Marchena Braves Eldrion Regina a presentá tambe e unifòrm nobo ku e tim lo lusí pa aña 2022.

Pronto Marchena Braves lo ta mas aktivo tambe riba media sosial pa asina komunidat por sera konosí ku e organisashon i mira desaroyo nan positivo ku tin den e organisashon aktual.