Dianan 15, 16 i 17 di aprel 2022 MUSTANG CLUB CURACAO TA ORGANISA E DI DOS SHOW DI OUTO MUSTANG DEN SAMBIL

Dianan 15, 16 i 17 di aprel 2022

MUSTANG CLUB CURACAO TA ORGANISA E DI DOS SHOW DI OUTO MUSTANG DEN SAMBIL

WILLEMSTAD —  Direktiva di Mustang Club Curaçao ( MCC) ya ta preparando pa e di dos show di outo Mustang den Sambil dianan 15, 16 i  17 di aprel awor, den estrecho koperashon ku Crown Automotive ku ta e dealer nobo di Mustang na Kòrsou. E promé show di outonan Mustang a tuma lugá den Sambil na 2019, pero pa motibu di pandemia, durante 2 aña sigui no por a organisá esaki. E show di 2019 tabata un éksito enorme.

Manera ta konosí, tur aña dia 17 di aprel, amantenan di Mustang ta rekordá ku esei ta e fecha di nansementu di  e prestigioso vehíkulo aki. E promé Mustang na Merka a mira lus dia 17 di aprel 1964. Pues aki dos aña, esta na 2024 Mustang lo selebrá 60 aña.

E aña aki tur kos ta mustra ku e di dos show lo bira aun mas grandi, na momentu ku  lo tin vehíkulonan otro ku lo keda eksponé. Na e momentunan aki MCC ta aserkando doñonan di Mustang ku kier forma parti di e tremendo show aki. Nan por tuma kontakto ku Sekretariado di MCC na +59996847918, kaminda ta haña tur informashon relashoná ku e di dos eksposishon di Mustang 2022. Tambe por registrá mediante di e link aki: https://forms.gle/8YmCXjXEcg4HELZ76

Despues lo tin un reunion informativo relashoná ku e di dos eksposishon di outonan Mustang ku  esnan ku a registrá pa partisipá. E meta ta pa yega na mas tantu outo Mustang di 1964 te ku 2022 posibel.

Atentamente

 

Direktiva di MCC

 

This site uses Akismet to reduce spam. Learn how your comment data is processed.

%d bloggers like this: