PROMÉ MINISTER GILMAR PISAS A REUNÍ KU MINISTER DI RELASHONNAN EKSTERIOR DI HULANDA

PROMÉ MINISTER GILMAR PISAS A REUNÍ KU MINISTER DI RELASHONNAN EKSTERIOR DI HULANDA

 

Willemstad – Promé Minister Gilmar Pisas a tene un reunion virtual ku e Minister di Relashonnan Eksterior di Hulanda, sr. Wopke Hoesktra dia 16 di mart 2022. 

 

Durante di e reunion e dos ministernan a haña oportunidat pa sera konosí ku otro i alabes hiba un kombersashon riba diferente punto manera entre otro e inougurashon di Presidente Boric na Chile, Venezuela i Ukrania. 

 

Promé Minister sr. Pisas a mustra gratitu pa ku e forma ku e embahada i e embahador di Reino Hulandes na Santiago de Chile a regla tur kos i a indiká ku tur aktividat a kana bon. 

Promé Minister a indiká tambe ku e la hasi uso di e oportunidat papia ku Presidente Boric di Chile i tambe ku su otro koleganan den Region, manera entre otro Repúblika Dominikana, Costa Rica i Guyana. 

 

Pa ku e tópiko di Venezuela, Promé Minister sr. Pisas a ekspresá su preokupashon pa ku e falta di reakshon di parti di e outoridatnan na Venezuela pa ku e asuntu di habri frontera ku e paisnan den Reino. Promé Minister sr. Pisas a splika ku di parti Kòrsou lo sigui hasi tur intento pa por logra esaki.

A papia brevemente tambe tokante e situashon di Refineria i algun otro punto na nivel diplomátiko. A indiká preokupashon riba e situashon ku tin aktualmente entre Rusia i Ukrania kual por tin efekto riba e relashonnan ku nos ke drecha ku Venezuela.

Otro punto ku a elaborá riba dje ta esun pa ku e retonan ku Kòrsou tin pa ku e situashon di e migrantenan ku ta keda bini Kòrsou. 

 

Minister sr. Hoekstra a indiká ku nan ta hopi preokupá pa e situashon na Ukrania i ku Hulanda lo keda reakshoná firmemente ku akshonnan manera sanshon. 

Tambe Minister sr. Hoekstra a indiká ku henter mundu lo sinti e konsekuensianan di e guera den nan ekonomia i ku nos tin di ta prepará pa esaki. 

 

Na final Minister sr. Hoekstra a mustra e deseo pa bishitá Kòrsou i tur e otro paísnan di Reino.

E kombersashonnan a kana den un ambiente hopi ameno i e ministernan a palabrá di lo sigui mantené kontakto ku otro.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: