Gezaghèber Rijna den kòmbersashon ku De Nederlandsche Bank i Autoriteit Financiële Markten

Gezaghèber Rijna durante su bishita di trabou na Hulanda Oropeo a hiba kòmbersashon ku presidente Klaas Knot i supervisor Richard Hoff di Banko Sentral di Hulanda (De Nederlandsche Bank – DNB). Tópiko di kòmbersashon tabata entre otro e ròl di Banko Sentral di Hulanda komo supervisor di tráfiko di pago i institutonan finansiero na Hulanda Karibense. Banda di esei Rijna a hiba kòmbersashon ku e miembro di direktiva Jos Heuvelman i e mènedjer supervishon di kuenta Ralph Lange di Outoridat Merkadonan Finansiero  (Autoriteit Financiële Markten – AFM).

Pa motibu di su ubikashon geográfiko i pasobra e ta un munisipio spesial di Hulanda, Boneiru ta atraktivo pa empresarionan i invershonistanan den sektor finansiero. ‘Tin bon oportunidat pa trese institutonan finansiero na nos isla. Pero e ora ei nos tin ku sòru sí pa tene partidonan ku mal intenshon pafó di porta. P’esei ku insistensia mi a pidi tantu Banko Sentral di Hulanda komo e Outoridat Merkadonan Finansiero pa mantené e supervishon skèrpi, meskos ku nan ta hasi den e parti oropeo di Hulanda tambe’, segun gezaghèber Rijna.

Banko Sentral di Hulanda i e Outoridat Merkadonan Finansiero ta tene supervishon riba institutonan finansiero, manera institutonan di krédito, kompanianan di seguro, proveedornan di krédito i konseheronan i mediadornan i agentenan apoderá di seguro òf krédito.