Minister Dangui Oduber UN WEEKEND GRANDI DI CELEBRACION DI HIMNO Y BANDERA

Minister Dangui Oduber

 

UN WEEKEND GRANDI DI CELEBRACION DI HIMNO Y BANDERA

 

E fin di siman cu a pasa, nos pais a celebra su dia nacional, dia di nos himno y bandera. Despues di 2 aña dificil cu e crisis di pandemia di Covid-19, porfin Aruba por a sali y celebra e fecha importante aki pa cada un di nos cu a nace of ta biba na Aruba.

 

Arubianonan den grandi a celebra e dia aki. 46 aña pasa Aruba a canta su Himno y wak su Bandera bay halto pa prome biaha den Wilhelmina Stadion, awendia conoci como Stadion Guillermo Prospero Trinidad. Pa esaki mi ta gradici mi tata Nelson Oduber y sigur nos libertador Betico Croes, tambe tur otro persona cu a percura pa awe nos por celebra nos dia nacional. Ami ta sintimi feliz y contento di por ta un Arubiano y di por canta nos mes un himno y tin nos mes un bandera y un fecha special pa celebra esaki. 

 

Diahuebs anochi ,17 maart 2022, gobierno di Aruba a organiza un manifestacion cultural riba Plaza Betico Croes. Un bunita anochi caminda esaki a wordo asisti pa Ministernan di Gabinete Wever Croes 2, Minister Heydoorn di Corsow, minister di St Maarten, presidente di Parlamento di Aruba y Corsou y tambe miembronan di parlamento di Aruba y Corsow. Un anochi caminda hopi Arubiano a haña e oportunidad pa mustra nan talento y nan amor pa Aruba, durante varios show cu a wordo presenta na e publico grandi. E publico a wordo deleita cu baile, musica, entretenimento y tambe poeta.

 

Diabiarna mainta, 18 maart 2022, tawata tin e actonan protocolario riba Plaza Betico Croes cu presencia di nos Gobernador Sr. Alfonso Boekhoudt y tur e mandatarionan y parlamentarionan di Aruba, Corsow y St Maarten. Tambe tawata tin e desfile di gruponan uniforma y scouts. Sigur un mainta bunita pa mira e desfile aki di nos muchanan cu hopi animo y energia. 

 

Durante dia tambe tawata tin varios actividad rond di Aruba cu a wordo bon bishita. Tambe Aruba a ricibi diferente bikers cu a bin di Merca, Corsou, Boneiro, St. Maarten, Surinam y Alemania. Tawata tin un bike ride organiza pa Iron Order MC Aruba riba diasabra y tambe un bike ride di Camacuri organiza riba diadomimgo.

 

Aruba por mira atras riba un weekend di celebracion grandi y nos ta contento di por mira Aruba celebra pasobra nos tur ta orguyoso di a nace riba e pida baranca aki cu nos ta yama Aruba.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: