GRAN APERTURA DI LIGA MCB PROMÉ DIVISHON 2021-2022! JONG HOLLAND LO TOPA UNDEBA DJADUMINGU 27 DI MART, 6’OR DI ATARDI DEN STADION RIGNAAL ‘JEAN’ FRANCISCA!
GRAN APERTURA DI LIGA MCB PROMÉ DIVISHON 2021-2022! JONG HOLLAND LO TOPA UNDEBA DJADUMINGU 27 DI MART, 6’OR DI ATARDI DEN STADION RIGNAAL ‘JEAN’ FRANCISCA!
Despues di un tremendo Kampionato aña pasa, FFK i MCB ta anunsiá e gran apertura di Liga MCB Promé Divishon ku lo tuma lugá djadumingu aki den Stadion Rignaal ‘Jean’ Francisca pa 6’or di atardi. E dos ekiponan ku lo mira akshon den e gran apertura di Liga MCB Promé Divishon ta Jong Holland i Undeba.
Promé ku bala kuminsá lora lo tin un tremdo show di D’Art ku presentashon di Sharrel ‘Adjatay’ Denisia, nos kantadó mayó. Tambe nos lo presentá e baluartenan ku lo dediká e kampionato na dje e aña aki. Durante ‘half-time’ lo tin diferente premio ku lo keda repartí i manera semper bar ku kushina lo ta bon surtí!
E aña aki Liga MCB ta wòrdu dediká na e siguiente baluartenan; Sr.Rignald Hato (èks hungadó/kolaboradó di FFK), Sr.Etiënne Siliee (tékniko), Sr.Malfried Sabina (èks rèfri), Sr.Erwin ‘Bazjòt’ Godfried (eks hungadó), Sr.Wilson Sommer (dirigente), Sr.Rignald ‘Bayena’ Clemencia (èks hungadó), i Sr.Robert ‘Robby’ Vicario (èks hungadó/masagista). E pèrsonanan aki ta tin un kontribushon enorme na e desaroyo di e deporte rei, futbòl. P’esei nan lo wòrdu homenahiá i FFK lo dediká e kampionato di e aña aki na nan.
Entrada pa apertura di Liga MCB Promé Divishon ta kosta fl 6,- pa adulto miéntras mucha di 6 te ku 12 aña i 60+ ta paga solamente fl. 2.50. Karchinan lo ta optenibel entrante djabièrnè, 25 di mart na ofisina di FFK i djadumingu promé ku wega na takia di FFK.
Gran mayoria di e partidonan di Liga MCB Promé Divishon lo tuma lugá den Stadion Rignaal ‘Jean’ Francisca i tambe den Stadion Antoine Maduro ku Stadion Ergilio Hato. Mayoria wega ta wòrdu hungá den wikènt esta, djabièrnè, djasabra i djadumingu pero lo bai tin tambe algun partido ku lo kai den siman i tur e weganan lo wòrdu dirigí pa árbitronan afiliá na FFK.
Preis pa kampionato regular ta 6 florin pa adulto miéntras mucha di 6 te ku 12 aña i 60+ ta kosta fl.2.50.
E ekiponan ku lo partisipá na Liga MCB Promé Divishon ta lo siguiente:
- Jong Holland
- Centro Barber
- Scherpenheuvel
- Jong Colombia
- Sithoc
- Centro Dominguito
- Victory Boys
- Subt
- Inter Willemstad
- Undeba
Liga MCB Promé Divishon lo wòrdu hunga di e siguiente manera:
E promé fase lo konsistí di dos buèlta regular den kua kada ekipo ta enfrentá otro na dos okashon ku un total di 90 wega. Den e segundo fase, e promé 6 ekiponan di e kampionato regular ta enfrentá otro na un okashon ku ta un total di 15 wega. Despues ta sigui e terser fase ku un buèlta di e promé kuater ekiponan di e ‘play off’ di 6 klup.
Den e ‘play off’ di 4 klup e klupnan ta enfrentá otro na un okashon ku ta un total di 6 wega.
Den e último fase di ‘play off’ di 4 klup, e dos promé ekiponan ta klasifiká pa e wega final di e kampionato pa mira kua ekipo ta titulá kampion di Liga MCB Promé Divishon.
Liga MCB Promé Divishon ta ranka sali den gran forma!
Undeba representando e pueblo di Banda Bou ta bin tur ku tin pa Jong Holland ku lo defendé nan título di Kampion di Liga MCB Promé Divishon aña pasá!
Un tabla lo bula den Stadion Rignaa ‘Jean’ Francisca djadumingu awor, 27 di mart.
Djaluna 28 di mart kos ta sigui kayente ku e gran inisio di Liga MCB Segundo Divishon, ku 2 partido sumamente interesante den Stadion Rignaal ‘Jean’ Francisca i Stadion Ergilio Hato.
Pueblo di Kòrsou ta keda kordialmente invitá pa bin na bòshi, bin apoyá bo ekipo preferí i disfrutá ku bo famia di e deporte rei, futbòl!
24 mart 2022