Eugene Rhuggenaath  Ku diferente kambio den mundu i den nos mes pais mi a ta realisá ku progreso ta rekerí dinamismo, pashon, kurashi, un mente hóben i kontinuashon.

Eugene Rhuggenaath 

Ku diferente kambio den mundu i den nos mes pais mi a ta realisá ku progreso ta rekerí dinamismo, pashon, kurashi, un mente hóben i kontinuashon.
Aña pasa ora mi a pone mi asiento den Parlamento na disposishon den e kuadro aki, mi a duna chèns na nos hóbennan polítiko. Tambe mi a kompartí ku boso ku mi lo a usa e tempu pa reflekshoná i enfoká riba e ròl ku mi ta mira pa mi mes den polítika i komo lider.
Despues di e resultado aña pasa di elekshon i evaluashon hasí den partido i den kombersashonnan ku diferente persona i mi famia, mi a pone tur forsa #huntu den partido i a involukrá tur hende den un plan di akshon pa por sigui traha riba esaki di paden bai pafó.
Ora mi a asumí e ròl di lider polítiko den 2017, mi no a wak esaki nunka komo un stul ku mi lo keda largu sinta riba dje, mirando ku un tarea prinsipal di un lider ta pa krea lider i brinda nan oportunidat pa krese.
P’esei ku un sintimentu di satisfakshon i orguyo mi a pasa liderazgo pa PAR su lider nobo; Quincy Girigorie. Ku e akto aki, mi tarea komo lider ta kompletá.
Durante un reunion general di miembresia ayera ( 29 mart 2022) mi a anunsiá ku lo mi pasa liderazgo pa Quincy Girigorie i tambe asumí e posishon di presidente di partido PAR.
E kambio awor ta un ku ta bin natural pa PAR. Lanta ku un vishon 28 aña pasa i konstruí riba un fundeshi fuerte, PAR semper a profilá su mes komo un partido inovativo i ku vishon. Den kuadro di esaki Quincy komo lider #huntu ku miembronan, simpatisante, komunidat, region i Reino por sigui enkaminá e kaminda pa futuro.
Mi ke yama un i tur danki pa boso sosten na ami i PAR. Meskos ku boso a sostené mi i ainda ta sostené, mi ke pidi boso pa sostené tambe PAR su lider polítiko nobo Quincy Girigorie.
Un danki di kurason tambe na mi señora esposa, Neshiem, mi yunan, famia, amigu, kolaborador i koleganan ku a karga ku mi den e periodo tras di lomba. Boso ta mi forsa.
“Mi ta sigurá boso: Si un pipita di trigo no kai den tera i muri, e ta keda djis un simia. Si e muri, e ta produsí hopi fruta.”
‭‭Huan‬ ‭12:24
Semper boso sirbidó
Eugene Rhuggenaath
Share this page to Telegram

This site uses Akismet to reduce spam. Learn how your comment data is processed.

%d bloggers like this: