Minister Maduro ta informa: Aduana di Aruba lo ricibi sosten y cooperacion di Aduana Hulandes den cuadro di acuerdo den Landspakket

Minister Maduro ta informa:

Aduana di Aruba lo ricibi sosten y cooperacion di Aduana Hulandes den cuadro di acuerdo den Landspakket

 

ORANJESTAD – Recientemente Minister Maduro di Finansa a haya bishita di Aduana di Hulanda den persona di sr. Bert de Haas y sr. Otto de Vries cu tabata compaña pa sr. Croes y sra. Cabenda di Aduana Aruba. Den cuadro di e acuerdo cu Hulanda manera stipula den punto H11 di e Landspakket, Aduana Hulandes lo bay brinda sosten y cooperacion na Aduana di Aruba pa e trabounan necesario pa reforsa seguridad di nos frontera. E meta di e bishita di Aduana Hulandes e biaha aki tabata pa cera conoci cu e organisacion di Aduana di Aruba y inventarisa e necesidad pa sosten y cooperacion cu Aduana Hulandes lo por brinda. Como parti di e cooperacion, lo planifica tambe un bishita pa Aduana na Hulanda pa asina e Aduaneronan di Aruba por mira di cerca e procesonan cu lo por wordo aplica na Aruba tambe. Den e cooperacion aki lo enfoca, entre otro, riba e maneho di risico pa e control door di Aduana. Minister Maduro ta spera cu e sosten y cooperacion cu Aduana Hulandes por brinda lo yuda pa sigui profesionalisa e trabou aduanero na Aruba, na bienestar di nos Pais.