Renaissance Wind Creek Curaçao Resort ta risibí  TUI Global Hotel Award 2022

 

 

Renaissance Wind Creek Curaçao Resort ta risibí  TUI Global Hotel Award 2022

 

WILLEMSTAD – Renaissance Wind Creek Curaçao Resort ta risibí otro bon notisia, e biaha aki for di TUI Group. Un bes mas e tim kompletu a sá di destaká ofresiendo servisio ekselente na tur bishitante di e resort. Sra. Maritza Molina, direktor di benta i merkadeo pa Renaissance Wind Creek Curaçao Resort, a felisitá su koleganan bisando, “Ta un orguyo grandi pa risibí e rekonosementu di TUI, e servisio i eksperensia di e huéspet a keda midí durante 12 luna i finalmente a duna Renaissance Wind Creek Curaçao Resort e mihó kualifikashon pa e TUI Global Hotel Award. Un rekonosementu asin’aki pa kualke hotèl ta e distinshon di mas haltu den su merkado spesífiko i ta rekonosé atenshon na detaye i servisio. Masha Pabien!”

 

Tur aña di nobo TUI Group ta duna rekonosementu na hotèlnan ku ta ofresé servisio ekselente i ta brinda klientenan un eksperensia inolvidabel. E aña aki Renaissance Wind Creek Curaçao Resort ta risibí e premio TUI Global Hotel Award i asina bira un di e 10 mihó hotèlnan den e programa di vakashon di TUI mundialmente. Kualifikashon pa esaki ta bin for di reseña di klientenan i e skor di satisfakshon. Despues ku klientenan biaha ku TUI nan por duna ‘feedback’ i ‘rate’ e satisfakshon i eksperensia di nan fakansi. E enkuesta aki ta e base pa selekshoná e ganadornan di TUI Global Hotel Award.