AKUERDO DI ENTENDIMENTU FIRMÁ ENTRE WORLD FREE ZONES ORGANIZATION I CURINDE TA PARTI DI STRATEGIA BON DELINEÁ PA KRESE NOS ZONANAN EKONÓMIKO

AKUERDO DI ENTENDIMENTU FIRMÁ ENTRE WORLD FREE ZONES ORGANIZATION I CURINDE TA PARTI DI STRATEGIA BON DELINEÁ PA KRESE NOS ZONANAN EKONÓMIKO

Willemstad 31 di Mart 2022 – E akuerdo firmá riba Djaluna 28 di Mart na Dubai entre World Free Zones Organization (WFZO) i Curaçao Industrial and International Trade Development Company N.V. (CURINDE) komo un miembro aktivo di WFZO, ta forma parti di un strategia delineá pa CURINDE su Zonanan Ekonómiko krese na un forma sostenibel. E akuerdo entre WFZO i CURINDE a keda firmá den presensha di Promé Minister, Sr. Gilmar Pisas, ku a enkabesá e delegashon di Kòrsou na Dubai, akompañá pa Minister di Desaroyo Ekonómiko, Sr. Ruisandro Cijntje i demas miembronan di e delegashon, ku a reuní ku e CEO di WFZO, Dr. Samir Hamrouni.  Dr. Samir Hamrouni a firma e akuerdo di intenshon na  nòmber di WFZO mientras Sra. Jacqueline Jansen a firma na nòmber di CURINDE.  E akuerdo aki ta habri kaminda pa CURINDE tin akseso na konosementu i sosten di WFZO, i ta ofresé CURINDE un plataforma úniko pa desaroyo di nos zonanan i empresanan ku ta establesé den nos Zonanan Ekonómiko.

Reunion i akuerdo ku WFZO ta brinda oportunidatnan úniko

E delegashon enkabesá pa Promé Minister Pisas i akompañá pa Minister Cijntje a risibí un presentashon amplio di WFZO ku a toka temanan manera kon importante un zona liber  ta pa ekonomia di un pais.

E akuerdo firmá ta den e liña di sosten ku e organisashon mundial aki di Zonanan Ekonómiko ta duna na partnernan manera awor CURINDE. Den e akuerdo di entendimientu firmá entre CURINDE i WFZO ta resaltá ku:

• CURINDE lo ta e punto di kontakto nashonal di WFZO na Kòrsou;
• WFZO lo konsehá CURINDE riba oportunidatnan di outomatisashon i robotisashon di prosesonan logístiko i industrial;
• Lo hasi promoshon di aktividatnan den Karibe i bou di klientenan di CURINDE i demas empresarionan lokal ku por brinda oportunidatnan, tantu pa Kòrsou komo otro paisnan den region.

Dr. Hamrouni, durante di e reunion, a akspresá ku tabata un plaser di por a risibí delegashon di Kòrsou den nan ofisina prinsipal na Dubai.

“Ta importante kontinuá ku partisipashon na evenementonan internashonal ku ta un forma di promoshon ku lo sirbi pa fortifiká lasonan entre Kòrsou i demas paisnan di kual Kòrsou por benefisiá i ku lo resultá entre otro den mas oportunidat di kresementu, diversifikashon i mihó kalidat di servisio”, asina Sra. Jansen, Gerente General di CURINDE a deklará.

WFZO

World Free Zone Organization ta un organisashon mundial lantá na Mei 2014 na Dubai.  E ta duna un bos kolektivo ku outoridat na Zonanan Ekonómiko rònt mundu. Su mishon ta pa trese Zonanan Ekonómiko di rònt mundu huntu i promové nan impakto positivo dor di duna guía, konosementu i servisionan na su miembronan, pa asina engrandesé nan kontribushon na prosperidat i desaroyo sosial den e diferente paisnan. E vishon di WFZO ta pa Zonanan Ekonómiko keda rekonosé mundialmente komo un instrumènt pa desaroyo, prosperidat ekonómiko i tambe sosio-ekonomiko sostenibel. CURINDE ta ekstendé un danki speshal na Dr. Martin Ibarra, un eksperto rekonosí mundialmente riba tereno di desaroyo di Zonanan Ekonómiko, pa su intervenshon i sosten den logra yega na un akuerdo di entendimentu ku WFZO