CBCS ta revisá su proyekshon ekonómiko Inflashon haltu lo persistí na 2022

REDAKSHON April 1, 2022 0 Comments

CBCS ta revisá su proyekshon ekonómiko Inflashon haltu lo persistí na 2022

WILLEMSTAD/PHILIPSBURG — Di akuerdo ku Richard Doornbosch, Presidente di Centrale Bank
van Curaçao en Sint Maarten (CBCS), ta sigui premirá ku Kòrsou i Sint Maarten lo keda riba e ruta
di rekuperashon ekonómiko durante 2022 i ku lo tin un aselerashon di aktividat ekonómiko den
tur dos pais. Sin embargo, inflashon mas haltu ku a proyektá inisialmente debí na e oumento den
preis di materia prima riba merkado internashonal i e trabanan den kadena di suministro, inflashon
a resultá di ta mas haltu ku loke a proyektá inisialmente i, en bista di esei, a moderá e pronóstiko
pa Kòrsou ku 0,5 punto porsentual te na 6,1% i pa Sint Maarten ku 0,3 punto porsentual te na
14,3%.
Aunke den e Perspektiva di desèmber 2021, a premirá un bahada di inflashon na tur dos pais di e
union monetario, e proyekshon aktual ta indiká ku inflashon lo sigui oumentá durante 2022 “Pa
Kòrsou, a revisá e pronóstiko di inflashon pariba ku 1,5 punto porsentual te na 4,9 %, mientras ku
na Sint Maarten ta spera ku inflashon ta keda mantené haltu na 4,1 %, 1,3 punto porsentual mas ku
a proyektá anteriormente.E oumento di inflashon lo limitá entrada disponibel i, debí na esei, afektá
konsumo privá den tur dos pais’, asina Doornbosch ta splika den e edishon di mart 2022 di Banko
Sentral su Economic Bulletin.
Doornbosch ta atvertí ku e akontesimentunan mundial aktual a oumentá e riesgonan di inflashon
signifikante. “Efekto indirekto di e invashon resien di Rusia na Ukrania, manera oumento di preis di
krudo i produkto di grano riba merkado internashonal, i mas traba den e kadena di suministro, por
pone inflashon subi asta mas den henter e union monetario i asina stroba kresementu. Ademas,
un oumento di inflashon lo por afektá e nivel di entrada disponibel na Estádos Unídos i Hulanda, e
dos merkadonan prinsipal pa turismo na Sint Maarten i Kòrsou, i asina afektá e oumento proyektá
den yegada di turista. Fuera di esei, un depresiashon fuerte di euro na komparashon ku dòler
relashoná ku e konflikto na Ukrania lo hasi Kòrsou i Sint Maarten mas karu pa turista europeo”, e
ta splika.
E teksto kompleto di e Informe di Presidente i e Economic Bulletin di Banko pa mart 2022 ta
disponibel riba website di Banko Sentral na https://www.centralbank.cw/publications/economicbulletins.