KUADRO DI SUPERVISHON I EVALUASHON PA ENSEÑANSA PROFESHONAL SEKUNDARIO

MINISTERIO KONSERNÍ ENSEÑANSA, SIENSIA, KULTURA & DEPORTE

 

KUADRO DI SUPERVISHON I EVALUASHON PA ENSEÑANSA PROFESHONAL SEKUNDARIO

PUBLIKÁ RIBA 06 APREL 2022

Inspekshon di Enseñansa ta presentá e Kuadro di Supervishon i Evaluashon pa Enseñansa Profeshonal Sekundario  na instituto i nan direktiva.

WILLEMSTAD – Inspekshon di Enseñansa ku ta forma parti di e Ministerio di Enseñansa, Siensia, Kultura & Deporte ta enkargá ku supervishon di kalidat di Enseñansa. Konforme e plan di Supervishon pa aña 2022, djabièrnè último, 1 di aprel 2022 a presentá e Kuadro di Supervishon i Evaluashon pa Enseñansa Profeshonal Sekundario (SBO) revisá.  E seshon a hiba komo tema: “No pa nos kuenta, ban pa 80%”.

Inspektor-General huntu ku e kordinadó di supervishon pa Enseñansa Profeshonal Sekundario a presentá e kuadro di supervishon i evaluashon revisá ku ta bai usa. E kuadro aki ta konektá ku Ordenansa nashonal profeshonal sekundario i edukashon pa adulto i Ordenansa nashonal supervishon di enseñansa. A revisá e dokumento original ku intenshon pa mehorá supervishon. E kuadro ta deskribí den un dokumento tantu na papiamentu i hulandes. E dokumento ta ratifiká pa medio di dekreto ministerial fechá 28 di mart 2022.  Inspekshon di Enseñansa ta supervisá tur instituto ku ta ofresé estudio na nivel di enseñansa profeshonal sekundario rekonosé pa Minister di Enseñansa, Siensia, Kultura i Deporte. E kuadro di supervishon ta bálido pa tantu instituto supsidiá komo no supsidiá pa gobièrnu.

Pa aña 2022 e énfasis ta riba supervishon básiko ku ta nifiká kontròl di kalidat básiko. E kalidat básiko ta deskribí a base di tres área di kalidat: kumplimentu ku lei, eksaminashon i proseso pa otorgá diploma i mantenshon di kalidat. Ku e supervishon, Inspekshon di Enseñansa ke determiná si e instituto ta kumpli ku kalidat básiko i/òf ta stimulá kuido di kalidat interno sufisientemente. Ta e intenshon pa 1 di desèmber 2022 tur instituto pa enseñansa profeshonal sekundario kumpli ku 80% òf mas di e kalidat básiko.

Ku implementashon di e kuadro aki Inspekshon di Enseñansa ke logra un supervishon efektivo ku ta stimulá: uniformidat, transparensia i evaluashon di kalidat di un manera igual. Pa mas informashon tokante supervishon di kalidat di enseñansa por mail nos na secretariaatio@gobiernu.cw òf yama na 434 3772.

** riba e potrètnan athunto por tuma nota di e aktividat i na momentu ku Inspektor-General sra. R. Bitorina a hasi entrega di e kuadro di forma ofisial na Sekretario-General di Ministerio di ESKD sr. C. de Graaff.

Share this page to Telegram

This site uses Akismet to reduce spam. Learn how your comment data is processed.

%d bloggers like this: