Aksidente di tráfiko ku herido.

KOMUNIKADO DI PRENSA 223 /2022
24 aprel 2022
Aksidente di tráfiko ku herido.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Djasabra 23 di aprel 2022 alrededor di 21.03’or, Sentral di Polis a risibí informashon di un
aksidente bastante grave ku a tuma lugá riba Helmin Magno Wiels Blvd na altura di Kaya
Frater Amado Römer.
Na yegada di e promé unidat, el a bin topa shofùr di un pikòp parsialmente bou di e
vehíkulo ku tabata riba su banda.
For di investigashon a sali na kla ku shofùr di e pikop aki tabata kore riba Helmin Magno
Wiels Blvd den direkshon di Otrobanda.
Yegando na e lusnan di tráfiko riba e krusada Helmin Magno Wiels Blvd i Kaya Frater Amado
Römer, shofùr di e vehíkulo aki a bai hala na man drechi i subi e parti di kaminda ku ta
destiná pa subi kaya Amado Römer. Despues el a bolbe hala na man drechi i pasa dilanti di
algun vehíkulo ku tabata pará riba e parti di kaya destiná pa sigui stret bai den direkshon di
Otrobanda. Na e momentu ei nan lus tabata korá.
Pasando den lus korá, e pikòp aki a bin aksidentá den un otro vehíkulo ku tabata subiendo
Kaya Frater Amado Römer i di kua su lus sí tabata bèrdè.
A konsekuensia di e dalmentu aki, e pikòp a bòltu riba su banda i saka e shofùr ku no
tabatin su faha di seguridat bistí, parsialmente for di e vehíkulo.
E shofùr a keda pegá ku su pianan bou di e vehíkulo i a frakturá esakinan. Tambe el a risibí
sla na kabes.
Despues ku ekípo di reskate di brantwer a saka e shofùr for di e posishon ku e tabata aden,
ambulans a transport’é ku urgensia pa sala di emergensia di C.M.C.
Investigashon den e kaso ta kontinuá.