Kansion i videoclip nobo di Vivakids Recycleband Ku Man Na Kurason
Kansion i videoclip nobo di Vivakids Recycleband Ku Man Na Kurason
Willemstad- Despues di hopi warda, porfin VivaKids Recycleband por anunsiá ku hopi orguyo, e
lansamentu ofisial di un kansion nobo i su videoclip pa tur nos muchanan di Kòrsou, Aruba i
Boneiru.
E kansion akí ta entitulá ‘Ku Man Na Kurason’. ‘Ku Man Na Kurason’ ta un kansion ku a nase
den e temporada di pandemia C19. E kansion a keda skirbí dor di e muchanan di VivaKids
Recycleband mes, huntu ku Omar Sling.
Jaer Thomson ta e integrante di Vivakids Recycleband ku ta interpretá ‘Ku Man Na Kurason’,
den kua e ta papia di nos dushi Kòrsou i su dushi hendenan ku gusta ambiente i fiesta. E kansion
aki ta konsientisá komunidat pa por sigui kuida di otro, mustrando afekshon pero alaves kòrda
kada unu di nos pa tene kuenta ku e reglanan i medidanan pa yuda mantene e kontagionan
abou.
Den un manera masha grasioso i úniko VivaKids Recycleband ta pone e infasis riba un manera
nobo pa saludá otro.
E forma rítmiko i alegre di VivaKids Recycleband sigur lo pone grandi i chikí move i gosa i alabes
konsientisá pueblo di Kòrsou di e medidanan pa tene kontagio di e pandemia abou.
E videoclip ku a keda produsí huntu ku e kansion ta forma parti di e prueba final ku e muchanan
ta pasa pa sera e periodo i tèst nan kresementu i desaroyo di nan abilidatnan. Kada periodo, ta
konsistí ku e muchanan ta wòrdu guiá den traha i siña toka un kantika nobo, graba esaki den un
studio di produkshon i por último graba esaki su videoclip. Pa e video aki e muchanan di
VivaKids Recycleband a diseñá i krea e ophetonan i traha e trajenan i asesorionan di e aktornan.
E muchanan a husa materialnan resiklá manera kaha di karton, dòpi, bòter di plèstik èts.
VivaKids Recycleband ta un proyekto ku e artista multi talentoso, Omar Sling a inisiá na aña
2017. Di forma kompletamente grátis, e muchanan di Vivakids Recycleband ta bini huntu tur
Djasabra den Atelier Omar Sling i no solamente ta toka i kanta, pero tambe ta siña di e
importansia di resiklahe i nos medio ambiente, arte, formashon i kultura. Di e forma ak, Omar
Sling ta invertí i duna bèk na nos komunidat. E meta ta, pa sigui invertí i ekipá e muchanan akí
mas tantu posibel di moda ku mañan nan tambe por sigui karga e pais akí pa dilanti.
Mirando ku VivaKids Recycleband ta un proyekto grátis, nos ta inmensamente agradesido di por
a bolbe konta ku e apoyo i yudansa di diferente persona i instansia pa por a logra produkshon di
e kansion i videoclip aki.
VivaKids Recycleband ta yama un danki di kurason na entre otro:
EWT, Esperamos Supermarket, BoFrei Agencies, CocaCola, Ministerio di Enseñansa Siensia
Kultura i Deporte, La Reina, Grupo di Teater Kishikishi ku na aktornan Eduard Reineta, Crisen
Scorea i Sheldon Angelister, Explosion Dansers ku nan aktornan Dianthely Pourier, Kydionna
Polonius, Soline de Jongh, Raisis Escoto.
Tambe nos kier yama danki na:
RECORDING STUDIO: Jamz Caribbean. CAMERA & EDITING: Futuristic Production.
DIRECTING & PRODUCED: Omar Sling.
HELPERS: VivaKids Parents, Oma Chichi, Welinchi, Ludwig Jansen, Rayen Dj RAY. Masha masha
DANKI. Boso aporte di bèrdat tabata super balioso pa nos.
Abo tambe por disfrutá di e videoclip di ‘Ku Man Na Kurason’ tantu riba e Youtube komo e
página di Facebook di Vivakids Recycleband. Mas ku klaro ‘like & share’ e videoclip i asina
sostené Vivakids Recycleband den e bunita i humilde proyekto aki ku nos ta hasi ku hopi amor
pa tur nos.
Sigi nos riba rednan social pa mas informashon
FaceBook | YouTUBE | Insstagram | TikTok Viva Kids Recycle Band
YouTube Search Viva Kids Recycle Band. “Ku Man na kurason”