Minister Larmonie-Cecilia a logra ku 854 yu di Kòrsou ta bai laborá na Sandals Resort. 

 

Minister Larmonie-Cecilia a logra ku 854 yu di Kòrsou ta bai laborá na Sandals Resort.

 

Korsou, 25 April 2022

Despues di varios reunion i esfuerso entre minister Ruthmilda Larmonie-Cecilia i Kevin Clarke ku ta general mènedjer di e kandela hotelero Sandals, a logra ku gran mayoria di e trahadonan e resòrt nobo lo ta yunan di tera.

For di inisio Sandals a indiká ku na su otro resòrtnan den eksterior 86% di e empleadonan ta lokal i ku nan tin mesun meta pa ku e projekto na Kòrsou tambe. Na òktober 2021 gobièrnu di Korsou a reuní ku Gebhard Rainer i Adam Steward, representantenan di Sandals Royal Curacao, ku a indika ku den e promé fase lo traha 350 kamber i despues lo amplia ku 100 pa 120 kamber mas den e di dos fase. Sandals Royal Curacao lo kuminsa krea un impakto ekonómiko di masomenos 25 pa 30 mion florin pa Kòrsou ku ta ekivalente na 250 hende na trabou, despues 450 i na final 800 pa 850 kupo di trabou. Den yanüari 2022 Minister Larmonie-Cicilia tabata na aeropuerto di Korsou pa deseá éksito na e promé grupo di 500 trahadónan ku a bai Jamaika pa training.

Motivá pa e vishon di minister di Desaroyo Sosial, Labor i Bienestar pa baha e tasa di desempleo aktual di 19.1%, a bolbe tene un rueda di prensa huntu ku Kevin Clarke di Sandals, pa logra yena e vakaturanan.

Seguidamente Sandals a habri porta na WTC pa kombersá ku tur persona interesá.
E resultado ta ku a logra ku 854 hende lokal ku konosementu i eksperensha lo bai laborá na Sandals.

Den e dianan ku ta sigui minister Ruthmilda Larmonie-Cecilia lo duna mas informashon relashoná ku akshonnan konkreto di SOAW pa sigui traha pa logra ku mas yu di Kòrsou ta drenta den e proseso laboral.