Ministerio di Turismo y Salud Publico ta informa: Tocante e ley cu ta limita e uzo di poductonan di tabaco (Articulo 4 y 5)

Ministerio di Turismo y Salud Publico ta informa:

Tocante e ley cu ta limita e uzo di poductonan di tabaco (Articulo 4 y 5)

ORANJESTAD – Manera ya caba ta conoci, Aruba lo bay conoce e implementacion di “Landsverordening Beperking Tabaksproducten (AB 2016 no.41)”, e implementacion di e ley ta drenta na vigor dialuna 2 di mei 2022. E ley aki ta un ley cu a keda aproba unanimamente den Parlamento di Aruba di 26 di october 2021. E ley aki ta bay prohibi tur menornan di 21 aña pa cumpra, uza of pa traha den areanan cu ta bende productonan di tabaco.

Den cuadro di e plan nacional di prevencion Ministerio di Salud Publico conhuntamente cu Departamento di Salud Publico ta dedica na mehora e calidad bida, servicio y salud di Aruba su comunidad. E ley cu ta limita e uzo di poductonan di tabaco ta un di e aspectonan importante den Aruba su plan nacional di prevencion den salud. E ley ta importante, mirando cu uzo di sigaria ta dañino no solamente pa persona cu ta huma cual ta 13% di e populacion di Aruba riba 20 aña, pero tambe pa es(nan) cu ta den cercania.

Articulo 4: no lo ta permiti pa huma den transporte publico

Den articulo 4 di e ley di tabaco ta stipula cu no ta permiti pa huma productonan di tabaco den transporte publico. Esaki ta inclui bus grandi, bus chikito, taxi, of cualkier otro forma di transporte publico. E control di esaki lo bay wordo implementa pa Korps Politie Aruba y lo tin un multa pa incumplimento di esaki. E articulo aki ta pa proteha e mucha y e adulto durante cu nan ta haci uzo di transportenan publico, aumentando asina e calidad di salud den nos transporte publico.

Articulo 5: ta prohibi pa bende of duna productonan di tabaco den cierto instancianan (gubernamental/caricativo)

Den e articulo 5 di e ley di tabaco ta stipula cu no ta permiti benta den ningun forma di productonan di tabaco na instancianan di gobierno, na instancianan medico, na instancianan di cultura y arte, na instancianan deportivo y por ultimo na instancianan educativo.

Ministerio di Salud Publico ta pidi tur e companianan y tambe personanan cu tin permiso pa duna e servicio di transporte publico pa tene bon cuenta cu articulo 4 di e ley di tabaco. Tambe ta pidi tur instancianan menciona pa cumpli cu articulo 5 di e ley di tabaco. Pa mas informacion semper por tuma contacto cu DVG.

Aruba por logra tin un comunidad mas saludabel. E ta rekeri responsabilidad y compromiso pa cuida nos mes mas, come mas saludabel y ta mas activo. Sea consciente cu productonan di tabaco ta malo pa bo salud. Hunto nos lo bai logra.

Share this page to Telegram

This site uses Akismet to reduce spam. Learn how your comment data is processed.

%d bloggers like this: