KONMEMORASHON DIA DI SAKRIFISIO PATRIMONIAL RIBA 4 DI MEI DI 2022
MINISTERIO KONSERNÍ ENSEÑANSA, SIENSIA, KULTURA & DEPORTE
KONMEMORASHON DIA DI SAKRIFISIO PATRIMONIAL RIBA 4 DI MEI DI 2022
PUBLIKÁ RIBA 03 MEI 2022
Seremonia di “Dodenherdenking”
WILLEMSTAD – Gobièrnu di Kòrsou ta tene un seremonia solèm riba dia 4 di mei 2022 di 08:30 pa 11:00 pa konmemorá ku 77 aña pasa nos hendenan ku a sakrifiká nan bida durante di segunda Guera Mundial. E dia di komemorashon nashonal aki ta tuma lugá na e monumento di Guera na Waaigat na Punda i na Santana Militar na Roodeweg. Esaki ta speshalmente pa rekordá tur persona ku di un òf otro forma a fayesé durante di e segunda Guera Mundial. Tema di e konmemorashon aña aki ta pa nos reflekshoná riba: ‘Liber den Aliansa’.
Na febrüari di aña 1942, Kòrsou i Aruba ta keda ataká pa submarino aleman i nos islanan tambe a eksperiensha e guera i a keda marká den nos historia. Na Europa tambe nos tabatin diferente yunan di tera manera sr. Segundo J.A. (Boy) Ecury i sr. George J.L. Maduro ku a marka historia dor di lucha kontra e opresornan. Asina tambe tin vários hendenan mas ku a marka historia i a pèrdè nan bida durante di segunda Guera Mundial. Durante vários aña a pone atenshon na 129 persona ku a bira víktima. Pero despues di un investigashon di sr. Jos Rozenburg a bin sali na kla ku mas persona a pèrdè nan bida. Gobièrnu di Kòrsou e momentu ei a amplia e kantidat di persona ku a kai den guera na un total di 176 persona.
Un petishon ta bai na henter Pueblo di Kòrsou pa huntu nos ban pone mas atenshon na nos historia ku énfasis riba libertat den aliansa den e konstelashon di Reino Hulandes ku nos tin komo pais outónomo. Un petishon na kada lider, maestro, dosente, hóben, studiante i pueblo di Kòrsou pa reflekshoná riba e fecha históriko aki. Ban hasi uzo di informashon di e “ Caribisch Denk Boek voor 04 en 05 mei i tambe wèpsait di Archivo Nashonal komo guia pa eduká nos nashon. Di e forma aki nos ke alsa patriotismo i nos edukashon kultural. Pa mas informashon di e fecha aki por bishitá na:
- https://guera-na-korsou.com/pap/;
- https://www.nationaalarchief.cw/geschiedenis/george-maduro;
- Tambe por hasi uso di transmishon via di televishon lokal, komo material edukashonal.
Durante e seremonia solèm dia 4 mei 2022 aki, ta bai desvelá e plaka nobo, ku ta konsisti 176 nòmber di e diferente víktimanan. Esaki ta keda pega na muraya di e monumento di Guera na Waaigat. Un invitashon ta bai na pueblo di Korsou i famianan di víktimanan pa forma parti di e seremonia aki.
—